Astanalyq ofıtser kóshede kenetten ınsýlt alǵan qarııaǵa kómekke keldi

ASTANA. QazAqparat – Elorda turǵyny, zapastaǵy áskerı qyzmetshi Rústem Sadyqov ótken jyly kútpegen jerden jolaı ushyrasqan beıtanys adamnyń ómirin qutqaryp qaldy. Ol ınsýlt alǵan zeınetkerge alǵashqy kómek kórsetip, jedel járdem shaqyryp, aýrýhanaǵa birge barǵan. Búgingi merekege oraı QazAqparat tilshisi ınsýlt alǵan aqsaqaldy ólimnen arashalaǵan erjúrek elordalyqpen áńgimelesken edi.

«Esimde, oqıǵa byltyr 4 tamyz kúni shamamen saǵat 17:30-da boldy. Kún ystyq. Jumystan kele jatqam, bir kezde alystan egde jastaǵy kisiniń teńselip kele jatqanyn baıqadym. Sosyn ol toqtady, mdereý janyna baryp «bári durys pa?» dep suradym. Úlken kisi kómektesýimdi, úıine deıin jetkizip salýymdy ótindi. Ózin jaısyz sezinip, basy aınalyp, kózi qaraýytypty. Aldymen zardap shegýshi meniń qoltyqtaýymmen júrdi, sálden soń jaǵdaıy nasharlap múldem aıaǵyn basa almaı qaldy. Men ony úıine deıin kóterip aparyp, kereýetke jatqyzdym, sý berdim», - deıdi Rústem Sadyqov.

Onyń aıtýynsha, er adamnyń jaǵdaıy odan ári qıyndaı túsken. Tipti bir sátke esinen aıyrylyp qalǵan.

Rústem dereý jedel járdem shaqyryp, ol kelem degenshe alǵashqy medıtsınalyq kómek kórsetken.

Jedel járdem jetkenshe zeınetker esin taǵy joǵaltpaýy úshin onymen únemi sóılesip otyrǵan.

Naýqas qarııa ózin Vladımır Aleksandrovıch dep tanystyrǵan.

«Jedel járdem dárigerleri naýqastyń qan qysymyn ólshep, ınsýlt alǵan degen boljam jasady. Sosyn men Vladımır Aleksandrovıch pen dárigerlerge kómektesip aýrýhanaǵa birge bardym. Jol-jónekeı jaqyndaryna habarladyq. Aýrýhanada reanımatsııa bólimine jatqyzdy. Áıeli jáne jaqyndary qala syrtynda bolǵandyqtan aýrýhanaǵa erteńine keldi. Olar maǵan rahmetin aıtyp, telefon nómirimdi jazyp aldy. Sodan keıin ǵana úıge kettim», - deıdi beıbit kúnniń batyry.

Rústem úıge kelgen soń naýqastyń jaǵdaıyn ýaıymdap, ne bolǵanyn bilý úshin aýrýhanaǵa taǵy kelgen.

Málimdeýinshe, áli kúnge deıin arasynda Vladımır Aleksandrovıchtiń áıelimen sóılesip, onyń jaǵdaıyn surap turady.

Keıin belgili bolǵandaı, astanalyq azamat Rústem Sadyqov Qorǵanys mınıstrligi bas qolbasshylyǵynyń zapastaǵy generalyn qutqarǵan eken.

«Vladımır Aleksandrovıch aýrýhanada 2 aı jatty. Ol estý qabiletinen aırylyp, sóıleı jáne qozǵala almaı qalǵan. Byltyr alǵan ınsýlttan tek bıyl naýryzda, birneshe ońaltý protsedýrasynan keıin ǵana ózine keldi. Qazir sóıleı alady, degenmen áli túsiniksizdeý. Taıaýda ǵana naýqastyń áıeli habarlasyp, «Rústem Maratuly, eger siz bolmasańyz generaldan aırylyp qalar edik» dep taǵy alǵysyn aıtty», - deıdi ol.

Rústem Sadyqov - zapastaǵy ofıtser. Uzaq jyldar Óskemende quqyq qorǵaý organdarynda jumys istegen.

2020 jyly otbasylyq jaǵdaıyna baılanysty elordaǵa kóship kelgen. Qazirgi ýaqytta qaýipsizdik salasynda jumys isteıdi.

Sondaı-aq, qutqarýshy ózin batyr sanamaıtynyn aıtty.

«Ofıtserler qorǵaý kerek, bizdi solaı úıretken», - dep qorytyndylady ol.