Astanalyq mýzykanttar áıgili pıanınoshy Van Klıbernmen onlaın konferentsııada suhbattasty
ASTANA. 28 maýsym. QazAqparat /Jasulan Amanbaıuly/ - Astanadaǵy Qazaq ulttyq óner ýnıversıteti álemge áıgili mýzykant, amerıkalyq pıanınoshy, P. I. Chaıkovskıı atyndaǵy Halyqaralyq baıqaýdyń alǵashqy jeńimpazy Van Klıbernmen onlaın konferentsııa arqyly tildesti.
Maestromen suhbattasý úshin «Shabyt» óner shańyraǵynyń úlken zalyna ýnıversıtet ustazdary men tálimgerleri, sondaı-aq mýzyka súıer qaýym jınaldy. Olar qazirgi zamannyń uly mýzykantyna tikeleı saýaldar qoıa alady.
«Atalmysh konferentsııa P. I. Chaıkovskıı atyndaǵy Máskeý memlekettik konservatorııasynan birneshe memleketke, sonyń ishinde Qazaqstan, Qyrǵyzstan, Tájikstan, Ózbekstan elderine taratylady», - deıdi Qazaq ulttyq óner ýnıversıtetiniń rektory, QR halyq ártisi, professor Aıman Musaqojaeva.
A. Musaqojaevanyń aıtýynsha, stýdentter V. Klıbernniń úlken mýzykant retinde pedagogıkada ózin qalaı ustaıtyndyǵyn, jas ónerpazdarǵa degen kózqarasyn jáne Qazaqstan mýzykanttarymen áriptestik ornatýǵa qalaı qaraıtyndyǵyn bilgileri keledi.
Astanadaǵy Qazaq ulttyq óner ýnıversıteti Reseıdiń P. I. Chaıkovskıı atyndaǵy Máskeý memlekettik konservatorııasymen áriptestik ornatqan. Sonyń negizinde qos tarap sheberlik synyptarymen, semınarlar jáne baıqaýlarmen almasyp turady.
V. Klıbern 13 jasynan AQSh-tyń Karnegı-holynda óner kórsete bastaǵan. 1951 jyly Djýlıardsk mektebinde Rozına Levınniń synybynda tálim aldy. Leventrıtta (1954 j) jáne P. I. Chaıkovskıı atyndaǵy (1958 j) baıqaýlarda óziniń tańǵalarlyq jeńisinen keıin, V. Klıbern ataǵy aıdaı álemge tarala bastady. Van Klıbernniń sheberlik synyptary mádenıet áleminde úlken oqıǵa bolyp eseptelinedi.
