Astanalyq muǵalimder batysqazaqstandyqtarǵa ózderiniń bir kúndik jalaqysyn aýdardy
ASTANA. 25 sáýir. QazAqparat. Elimizdiń batysyndaǵy sý tasqyny barsha qazaqstandyqtardyń qabyrǵasyn qaıystyrǵany aıan. Resmı BAQ ókilderiniń habarlaýynsha, Batys Qazaqstan oblysyndaǵy kóktemgi sý tasqyny sáýir aıynda bastalyp, óńirdiń 22 eldi mekeni sý astynda qaldy.
Sodan beri apat saldaryn eńserýge qanshama kúsh pen jiger jumsaldy. Respýblıka turǵyndary osy náýbetke dýshar bolǵan batysqazaqstandyqtarǵa kómek qolyn sozýda.
20 sáýir kúni Astanadan jalpy quny 22,5 mln. teńgeni quraıtyn 45 tonna júk tıegen úsh avtokólik Oralǵa jetti.
Astana qalasynyń ákimi Imanǵalı Tasmaǵambetovtiń «Elordadan - Batysqa kómek» dep atalatyn qaıyrymdylyq is-sharasyn uıymdastyrý týraly bastamasyn otyzǵa jýyq kásipker qyzý qoldady. Halyqqa qajetti azyq-túlik pen kıim-keshek, turmys quraldary men tósek-oryn, dári-dármekter bir jarym táýliktiń ishinde jınalypty. Elordalyq bes qonaqúı, on alty bazar jáne onǵa tarta saýda úıiniń qojaıyndary Batys Qazaqstan oblysynda qalyptasyp otyrǵan kúrdeli jaǵdaıǵa qabyrǵasy qaıysatyndyqtaryn jáne otandastarynan qoldan kelgen kómekterin aıamaıtyndyqtaryn jetkizýin ótingen.
Astana qalalyq ákimdiginiń málimetinshe, qazirgi tańda apat saldaryn joıý maqsatynda arnaıy ashylǵan eki qaıyrymdylyq esepshotqa 55 mln. teńge qarajat kelip túsken. Úkimet qaýlysyna sáıkes, elimizdiń barlyq oblysy Oral óńirindegi tabıǵı apat saldaryn joıý jumystaryna 100 mln. teńge qarjy jóneltetini málim. Kórshiles Mańǵystaý jáne Atyraý oblystary alǵashqylardyń qatarynda árqaısysy 100 mln. teńgeden aýdardy.
«Bul úrdisten Astana qalasynyń Syrbaı Máýlenov atyndaǵy № 37-shi orta mektebi de syrt qalmady. Mektep dırektory, ulaǵatty ustaz Bazyl Ahmetovtyń bastamasymen mekteptiń jeke ujymy óz erikterimen ózderiniń bir kúndik jalaqylaryn Batys Qazaqstan oblysynyń sý tasqynynan zardap shekken turǵyndary úshin arnaıy ashylǵan esepshotqa aýdardy. Bul teńizge quıylǵan tamshy sekildi bolǵanymen, tamshydan ózen de, kól de quralatynyn esten shyǵarmaýymyz qajet sekildi», deıdi
Astana qalasynyń Syrbaı Máýlenov atyndaǵy № 37-shi orta mektebiniń muǵalimi Gúlden Jetkergenqyzy Nurqabyl.
