Astanalyq muǵalim Apple kompanııasynyń oqytýshysy mártebesin aldy
Nur-Sultan qalasyndaǵy Respýblıkalyq fızıka-matematıka mektebiniń pedagogi Qýanysh Maǵaýın Apple kýrstarynan ótip, emtıhandardy sátti tapsyrǵan. Sóıtip, qazaqstandyq muǵalimder arasynda alǵash bolyp sertıfıkat aldy. Qýanysh Maǵaýın Germanııa, Irlandııa, BAÁ, Mysyr, Úndistan jáne basqa da elderdiń pedagogterimen birge oqydy.
Aıta ketsek, Apple kompanııasy oqytýshylarǵa arnalǵan «Apple Certified Trainer» kýrstaryn jyl saıyn ótkizedi.
Endi ınformatıka pániniń muǵalimi Q.Maǵaýın álemniń úzdik ázirleýshileri bilim salasyndaǵy jańa jobalaryn tanystyratyn Apple Education eksklıýzıvti is-sharalaryna qatysa alady.
«Qazaqstan elektrondy oqýlyqtar men kúndelikter qoldanatyn, sondaı-aq emtıhandar men olımpıadalardy onlaın formatta ótkizetin sanaýly elderdiń qataryndamyz. Apple kýrstarynda Swift baǵdarlamalaý tili arqyly mobıldik qosymshalardy jasaý negizderin úırendik. Tálimgerler dáristi aǵylshyn tilinde ótkizdi. Meniń tobymda negizinen qosymshalar jasaýda mol tájirıbesi bar IT-mamandar oqydy. Al men toptaǵy jalǵyz muǵalim boldym. Barlyq emtıhandy tapsyryp, Apple oqytýshysy mártebesin alǵanyma qýanyshtymyn. Aldaǵy ýaqytta mektepte oqýshylarǵa arnalǵan mobıldik qosymshalar daıyndaý boıynsha kýrstar ótkizip, áriptesterimmen tájirıbe bólisýdi josparlap otyrmyn», – deıdi ınformatıka pániniń muǵalimi Qýanysh Maǵaýın.
Málim etilgendeı, pedagog Qýanysh Maǵaýınniń arqasynda Apple Authorized Training Center for Education (AATCE) mártebesi ózi jumys isteıtin mektepke de avtomatty túrde berildi. Endi elordadaǵy Respýblıkalyq fızıka-matematıka mektebi Swift qosymshasyn jasaý boıynsha kýrstar ótkizip, oqýshylardy sertıfıkattap, oqý ornynda Apple classroom zerthanasyn asha alady.
