Astanalyq memlekettik qyzmetkerler arasynda memlekettik til biliktiliginen baıqaý ótti
Shara tanystyrý, qazirgi kezde qoǵamdaǵy qazaq tiliniń máselesi, termınderdi jáne olardyń aýdarmasyn bilý jáne qatysýshylardyń halyq danalyǵynan oı qorytýy syndy 4 kezeńnen turdy.
«Bul baıqaý memlekettik qyzmetkerler úshin uıymdastyryldy. Qatysýshylar memlekettik tilde is júrgizý boıynsha jarysty. Jalpy baıqaýǵa qatysýǵa 15 memlekettik mekeme ótinim bergen. Sonyń ishinen ózara baq synasatyn 8 uıym iriktelinip alyndy», - dedi astana.kz saıtyna Tilderdi damytý basqarmasy onomastıka bóliminiń bas mamany Naǵıma Maılybaeva.
Atap aıtqanda, Saryarqa aýdany ákimdigi qyzmetkerleriniń «Saryarqa qyrandary», qalalyq Ekonomıka jáne bıýdjetti josparlaý basqarmasynyń «Alash ulandary», Astana qalasy Sanıtarlyq-epıdemıologııalyq saraptama ortalyǵy qyzmetkerleriniń «Otan», Muraǵattar jáne qujattama basqarmasynyń «Ǵasyrlar úni», Jastar saraıy qyzmetkerleriniń «Nar qazaq», Táýelsizdik saraıynyń «Táýelsizdik», Balalardyń quqyǵyn qorǵaý basqarmasy qyzmetkerleriniń «Káýsar», Bilim basqarmasynyń «Ulaǵat» komandalary kúsh synasty.
Jarys qorytyndysy boıynsha, Muraǵattar jáne qujattama basqarmasynyń «Ǵasyrlar úni» komandasy úzdik atandy. Qalalyq Ekonomıka jáne bıýdjetti josparlaý basqarmasynyń «Alash ulandary» komandasy ekinshi, Astana qalasy Sanıtarlyq-epıdemıologııalyq saraptama ortalyǵynyń «Otan» komandasy úshinshi oryn aldy.
