Astanalyq mekemeler 13 mlrd. teńge somasynda salyq tóleýden jaltarǵan
ASTANA. 23 qazan. QazAqparat - Astanalyq mekemeler 13 mlrd. teńge somasynda salyq tóleýden jaltarǵan. Bul týraly búgin Astana qalalyq qarjy polıtsııasy departamenti Kóleńkeli ekonomıka salasyndaǵy qylmystardy ashý basqarmasynyń bastyǵy Baqytjan Baıhanov málim etti.
«Aǵymdaǵy jyldyń ótken merziminde Astana qalalyq qarjy polıtsııasy departamentimen mekemelerdiń salyq tóleýden jaltarý faktileri boıynsha 47 qylmystyq is qozǵaldy. Atalǵan sanattaǵy qylmystyq ister boıynsha anyqtalǵan zııan kólemi 13 mıllıardtan astam somany qurady»,- dedi B.Baıhanov.
Onyń atap ótýinshe, ótken jyldyń 9 aıymen salystyrǵanda aǵymdaǵy jylǵy kórsetkishter 52 paıyzǵa ósken.
«Máselen, departamenttiń óndirisinde, 2009-2011 jyldar aralyǵynda deklaratsııaǵa jalǵan málimetter engizý arqyly jalpy somasy 1 mıllıardtan astam somaǵa salyq tóleýden jaltarǵan «Rahat ı K KZ» JShS basshylaryna qatysty qozǵalǵan qylmystyq is bar», - dedi ol.
