Astanalyq máslıhat depýtattary ákimniń soǵys ardagerlerine 150 myń teńgeden bólý jónindegi usynysyn qoldady
Elorda ákimi Imanǵalı Tasmaǵambetovtyń osy usynysyna dúısenbi kúni ótken qalalyq máslıhattyń kezekten tys 3-shi sessııasynda depýtattar qoldaý kórsetti, dep habarlady qala ákiminiń baspasóz qyzmeti.
«Búgingi tańda qalada 359 maıdanger turyp jatyr. Áleýmettik járdem kórsetý úshin qala bıýdjetinen 50 mln. teńge bólý qajet bolady», - dedi máslıhat depýtattary aldynda sóz alǵan Astana qalasynyń Jumyspen qamtý jáne áleýmettik baǵdarlamalar basqarmasynyń bastyǵy Alma Altybaeva.
Sondaı-aq soǵys ardagerleri men múgedekterine teńestirilgen tulǵalarǵa, tylda eńbek etken azamattarǵa taǵy 80 mln-ǵa jýyq teńge bólinedi. Aýǵan soǵysyna qatysýshylar, Chernobyl apatyn joıýshylar, fashızm tutqyndary, UOS qatysýshylarynyń jesirleri, Semeı ıadrolyq polıgonynan zardap shekkender 20 myńnan, al tylda eńbek etkender 10 myń teńgeden alady.
A.Altybaeva atap ótkendeı, ońtaıly ekonomıkalyq jaǵdaıdyń arqasynda áleýmettik járdem kólemin ótken jyly bekitilgen 2012 jylǵa qala bıýdjetinde kórsetilgen kólemmen salystyrǵanda ulǵaıtýǵa múmkindik týyp otyr.
UOS qatysýshylary men múgedekteri 8 mamyr kúni qosymsha tólemderin alady, al qalǵan sanattar boıynsha azamattarǵa tólemder bıýdjetti kezekti naqtylaý kezinde júrgiziledi.
Qazirgi tańda Astanada 359 UOS qatysýshylary, 1901 olarǵa teńestirilgen tulǵalar jáne 7900 tyl eńbekkerleri turyp jatyr.
