Astanalyq mamandar sheteldikterge medıtsınalyq kómek kórsetý qaǵıdalaryn túsindirdi
ASTANA. QazAqparat - Astana qalasynyń densaýlyq saqtaý basqarmasy mıgranttarǵa (QR azamattary bolyp tabylmaıtyn jandar) medıtsınalyq kómek kórsetý qaǵıdasyn túsindirdi, dep habarlaıdy QazAqparat.
«QR Úkimetiniń 2009 jylǵy 15 jeltoqsandaǵy № 2136 qaýlysyna sáıkes, tegin medıtsınalyq kómektiń kepildik berilgen kólemi Qazaqstan Respýblıkasynyń azamattary men oralmandarǵa beriledi. Mıgranttarǵa qatysty QR densaýlyq saqtaý mınıstriniń 2001 jylǵy 30 qyrkúıektegi «Mıgranttarǵa medıtsınalyq kómek kórsetý qaǵıdalaryn bekitý týraly» № 665 buıryǵy bar. Tarıhı Otanyna oralý úshin Qazaqstan Respýblıkasyna kelgen mıgranttar (oralman, etnıkalyq qazaq jáne onyń otbasy músheleri) Úkimettiń bekitilgen qaýlysyna sáıkes QR azamattarymen birdeı tegin medıtsınalyq kómek alady», - delingen habarlamada.
Tegin medıtsınalyq kómektiń kepildik berilgen kólem tizimine enbeıtin medıtsınalyq kómekter aqyly negizde, erikti medıtsınalyq saqtandyrý aıasynda nemese jumys berýshi esebinen iske asyrylady.
Qazaqstan aýmaǵynda júrgen mıgranttarǵa qorshaǵan ortaǵa qaýip tóndiretin juqpaly aýrýmen aýyrǵan jaǵdaıda tegin medıtsınalyq kómek kórsetiledi.
Odan ózge jaǵdaılarda mıgranttarǵa medıtsınalyq kómek aqyly negizde kórsetiledi.
