Astanalyq Qýyrshaq teatry jeke mekeme retinde jumys isteıtin bolady
ASTANA. 27 mamyr. QazAqparat/Aınur Kenebaeva/ - Astanalyq Qýyrshaq teatry budan bylaı jeke mekeme retinde jumys isteıtin bolady. Bul týraly búgin teatrdyń qyzmeti men bolashaq josparlarymen tanystyrý maqsatynda ótkizilgen baspasóz konferentsııasy barysynda málim boldy.
Buǵan deıin Astanalyq «Jas kórermender teatrynyń» quramynda bolǵan qýyrshaq teatry 2011 jyldyń naýryz aıynan bastap kommýnaldyq memlekettik qazynalyq kásiporyn retinde qaıta qurylyp, jeke mekeme retinde qoǵamǵa qyzmet kórsete bastady.
Búgingi kúni teatrda shyǵarmashylyq jetekshi Quralaı Esmuratova jáne qoıýshy-rejısser Aıjan Salaeva bastaǵan 52 qyzmetker jumys isteıdi.
Qýyrshaq teatrynyń dırektory Toǵjan Qasanǵalıevanyń aıtýy boıynsha, teatr repertýarynda qazirgi tańda ár túrli jastaǵy jas kórermender tobyna arnalǵan 10-nan astam spektakl bar. Balalar nazaryna usynylatyn shyǵarmalar jas búldirshinderdiń psıhologııalyq erekshelikterin eskere otyryp tańdap alynǵan. Onyń ishinde rýhanı tárbıelik máni zor Sáken Júnisovtyń «Atameken», Toǵjan Qasanǵalıevanyń «Samruq týraly ertegi» syndy shyǵarmalary men «Qyz jibek» poemasynyń jelisimen sahnalanatyn «Mahabbat týraly ańyz» atty spektalder mazmuny men tereńdigi jaǵynan jas urpaqty tárbıeleý turǵysynda erekshe oryn alady. Qoıylymdar negizinen eki tilde sahnalanady.
Teatr dırektorynyń pikirinshe, qýyrshaq teatrynyń jalpy qoǵamdyq máni zor, sebebi ol balany jastaıynan sezimtaldyqqa, rýhanı tazalyqqa baýlıdy, ulttyq rýhtaǵy sahnalyq qoıylymdar arqyly jas urpaqty otansúıgishtikke, adaldyqqa jeteleıdi, aq-qarany paıymdap, durys dúnıetanym qalyptastyrýǵa septigin tıgizedi. «Qýyrshaq teatry jas búldirshinniń alǵash qadam basatyn mádenı baspaldaǵy bolǵandyqtan, biz teatr arqyly búgingi kúnnen bastap úlken sahna úshin bolashaq sanaly kórermendi tárbıeleýdi maqsat etemiz, sebebi bala kezinen teatrǵa barýdy ádet etpegen tulǵa óse kele jalpy sahna ónerin ústirt qabyldaıtyn bolady. Sondyqtan balany mádenı sana qalyptastyrýǵa jas kezinen baýlý qajet», - dedi ol óz sózinde.
Aıta ketelik, qýyrshaq teatry Kókshetaý, Qyzylorda jáne Shymkent qalalaryna gastreldik saparmen baryp qaıtqan bolatyn. Bul tájirıbeni teatr áli de jalǵastyrmaq, aýyl-aımaqtardaǵy jas kórermenderdiń kóńilin aýlamaq. Sondaı-aq teatr ujymy balabaqshalarmen birlese jumys isteýdi dástúrge aınaldyrǵan.
Búgingi sharaǵa qatysqan mádenıet basqarmasynyń bastyǵy Bolat Jumaǵulov bolashaqta teatr úshin kem degende 300 kórermenge arnalǵan jeke ǵımarat bólý kózdelip otyrǵandyǵyn jetkizdi.
