Astanalyq qutqarýshy qaıtys bolǵan turǵyn úıdegi órttiń neden shyqqany anyqtaldy

ASTANA. QazAqparat – Qutqarýshy Asqar Zabıkýlın qaıtys bolǵan turǵyn úıdegi órttiń neden shyqqany anyqtaldy, dep habarlaıdy QazAqparat Astana qalasy TJD baspasóz qyzmetine silteme jasap.

Anyqtalǵanyndaı, «Qaharman» turǵyn úı kesheninde (Baýyrjan Momyshuly dańǵyly, 14) bolǵan órttiń shyǵý sebebi – elektr symdarynyń qysqa tuıyqtalýyna ákep soqtyrǵan uzartqysh jelisindegi aqaýlyq.

Eske salsaq, 16 qarashada Astanada kópqabatty úıden órt shyǵyp, 3 adam aýrýhanaǵa túsken edi.

Osy oqıǵada denesiniń 80 paıyzyn kúıik shalǵan órt sóndirýshi Asqar Zabıkýlın aýrýhanada jan tapsyrdy.

Mınıstrlik taratqan málimetke sáıkes, bıyl elorda aýmaǵynda 682 órt tirkelgen, onyń 105-i kóppáterli turǵyn úılerde. Ádette, órttiń sebepteri turǵyndardyń órt qaýipsizdiginiń qarapaıym talaptaryn saqtamaý bolyp tabylady.

Astana qalasynyń TJD elektr jelilerin, rozetkalardy aqaýsyz kúıde ustaýǵa, jelilik súzgilerdi jáne basqa da elektr quraldaryn jaramsyz kúıde paıdalanýǵa jol bermeýge erekshe nazar aýdarýdy eske salady.