Astanalyq kondýktorlar «qoıandardy» ustaý úshin ekeýlep jumys istep júr
ASTANA. QazAqparat - Elordada qatynaıtyn avtobýstardyń birinde jolaýshylar eki kondýktordyń jumys istep júrgenin baıqap qaldy. QazAqparat tilshisi sol avtobýsty taýyp alyp, ondaı sharany ne úshin engizgenin bildi.
Bas kezinde avtobýs kondýktory óz áriptesin taǵylymdamashy (stajer-red.) dep tanystyrsa da, artynan onyń ózine kómektesip júrgen ekinshi kondýktor ekenin jetkizip, ondaı sharaǵa ne úshin barǵanyn aıtyp berdi. Alaıda avtobýstyń baǵdary men óziniń aty-jónin kórsetpeýdi surady. Óıtkeni qazirgi erejege sáıkes, bir avtobýsta eki kondýktorǵa jumys isteýge bolmaıdy.
«Biz ondaı sharaǵa barýǵa májbúr bolyp otyrmyz. Sebebi tańerteń jáne keshki ýaqytta adam kóp bolady da, avtobýstyń bir jaq shetinen ekinshi shetine deıin jetkenshe «qoıan» bolyp minetin jolaýshylar jolaqysyn tólemeı, túsip ketedi. Ondaı adamdar ábden úırenip qalǵan. Jumysqa bara jatqanda da, shyqqanda da avtobýstyń adamǵa lyq toly ekenin bilip shyǵady. Sodan avtobýsqa minip, úsh-tórt aıaldamadan keıin túsip, kete beredi. Sol sebepti búgin kómekke taǵy bir kondýktordy shaqyrdym. Jaqsy boldy, eki jaq shetinen kimniń kirgenin, kimniń shyqqanyn kórip otyramyz da, jolaqysyn lezde jınap alamyz. Áıtpese, jalǵyz júrgende jolaýshylardyń arasymen syǵylysyp júrgeniń. Bir jerden mingen adamdardyń jolaqysyn jınap alǵansha, kezekti aıaldamadan kirip jatady. Ondaıda adamdy da, aqshany da sanap úlgermeısiń», - deıdi avtobýstyń óz kondýktory.
Onyń aıtýynsha, búginde bir avtobýsta eki kondýktorǵa jumys isteýge ruqsat joq. Avtopark basshylyǵy aqshanyń esep-qısaby buzylyp ketedi dep oılaıdy. Degenmen, árbir jolaýshy bılet talap etse, aqshanyń esebi buzylmaıdy.
