Astanalyq kompanııa qurylysta mert bolǵan adamǵa jarty mıllıon ótemaqy tóleıdi
ASTANA. QazAqparat - Elorda soty qurylysta qaza tapqan azamattyń týystaryna moraldyq zalal óndirip berdi, dep habarlaıdy «QazAqparat» HAA tilshisi Astana sotynyń baspasóz qyzmetine silteme jasap.
Astananyń Esil aýdandyq sotyna marqumnyń ápkesi inisiniń ómiri men densaýlyǵyna keltirilgen moraldyq zııan úshin jumys berýshiniń ústinen talap aryz túsiredi.
2017 jylǵy 17 shildede er adam turǵyn úı kesheniniń baǵandaryn montajdaý jumystaryn júrgizip jatqanda segizinshi qabattan qulap ketip, alǵan jaraqatynan sol jerde kóz jumdy.
«Marqumnyń JShS-men eńbek sharty jasalǵan jáne oqys oqıǵa týraly aktte jumys berýshiniń kinásinen eńbek qaýipsizdigi qamtamasyz etilmegen dep kórsetilgen», - dep atap ótti sotta.
Tekserý barysynda jumys berýshiniń jumys perımetri boıynsha bıiktikte ýaqytsha qorǵanysh qorshaýlaryn ornatpaǵandyǵy, sondaı-aq bıikte qaýipsiz jumys isteý ádisteri boıynsha oqýdan ótpegen adamdy montajdaý jumystaryn oryndaýyna jol bergeni anyqtaldy.
Sot talapkerdiń paıdasyna JShS-dan 500 000 teńge kóleminde moraldyq zalal óndirip berdi.
Sheshim zańdy kúshine engen joq.
