Astanalyq kolledj stýdentteriniń shákirtaqysy ósedi
ASTANA. QazAqparat - Astana qalasynda kolledj stýdentteriniń shákirtaqysy ósedi. Bul týraly búgin QR Premer-Mınıstriniń orynbasary Berdibek Saparbaevtyń qatysýymen ótken «Áleýmettik áleýet - Astana aıbary» atty keńes barysynda málim boldy.
«Kásiptik jáne tehnıkalyq bilim berý uıymdarynda, kolledjderde oqıtyn stýdentterdiń shákirtaqysynyń mólsherin arttyrýǵa shamamen 570 mln. teńge bólinip otyr. Budan bólek, kásiptik jáne tehnıkalyq bilim berý uıymdarynda mamandar daıarlaýǵa qatysty memlekettik tapsyrysty arttyrýǵa 315 mln teńge qarastyrylyp otyr. Al kolledjderdiń oqý-óndiristik sheberhanalaryndaǵy jabdyqtarǵa, zerthanalarǵa 50 mln. teńge baǵyttalatyn bolady», - dedi keńes barysynda QR Bilim jáne ǵylym mınıstri Aslan Sárinjipov.
Aıta keterligi, búgingi áleýmettik keńes taqyrybyndaǵy shara aıasynda Astana qalasy ákimdigi men birqatar memlekettik ortalyq organdar arasynda memorandýmdar jasalǵan bolatyn. 2015-2017 jyldarǵa arnalǵan memorandýmnyń bir baǵyty bilim berý salasyn qamtyp otyr.
