Astanalyq klınıkaǵa aýyrsyný sındromdaryn emdeýge arnalǵan qural-jabdyq ákelindi
ASTANA. QazAqparat - №1 qalalyq aýrýhanada neırofızıologııalyq ıntraoperatsııalyq monıtorıng júıe apparaty tanystyryldy, dep habarlaıdy Astana qalasy ákimdiginiń resmı saıty. Bul apparat qalalyq statsıonarlarda buryn-sońdy qoldanylmaǵan bolatyn.
Ol aýrýhanaǵa álemdik tájirıbede paıdalanylatyn neıromonıtorıng rejımderin oryndaýǵa múmkindik beredi. Ol kez kelgen kúrdeli operatsııalardy oryndaý barysynda, sonyń ishinde Parkınson jáne epılepsııa aýrýyna shaldyqqan patsıentterdi emdeýde qaýipsizdikti qamtamasyz etedi.
Qurylǵy aýyrsyný sındromdaryn da emdeýge múmkindik beredi. Bul - №1 qalalyq aýrýhananyń neırohırýrgııa bólimshesi damytyp jatqan jumys baǵyty.
«Munda neırofızıologııalyq ıntraoperatsııalyq monıtorıng júıe apparaty bar. Bul - aýyrsynýdy emdeýge arnalǵan qural. Biz qatty aýyrsynýdy emdeý joldaryn kórsetýge arnalǵan dáriske qatystyq. Bul adamǵa qatty aýyrsynýdan az ýaqytqa bolsa da, nemese uzaq ýaqytqa arylýǵa kómek beretin emdeý ádisi», - dedi «Central Clinic» aýyrsyný klınıkasynyń jetekshi mamany Ramıl Tankacheev.
Mamannyń paıymynsha, oǵan neıroablatsııa jáne neıromodýlıatsııa emdeý-dıagnostıkalyq blokadalar jatady.
Búgingi tańda birinshi qalalyq aýrýhanada bul baǵytta jumys isteýge múmkindik beretin jabdyqtar bar, ol radıojıilik koagýlıator, basqasha aıtqanda, ol ambýlatorııalyq hırýrgııa dep atalady.
Tankacheevanyń aıtýynsha, qazirgi kezde otyzdaǵy nemese jasy otyzdan asqan adamdardyń kóbisi aýyrsyný sındromynan zardap shegýde.
