Astanalyq kásipkerlerdi tartyp, sapaly ónim óndirýdi jolǵa qoıǵymyz keledi - BQO ákimi
ASTANA. QazAqparat - Búgin elordada Elbasynyń bıylǵy Joldaýyn júzege asyrý jáne óńiraralyq áriptestikti damytý maqsatynda Astana qalasy men Batys Qazaqstan oblysynyń ákimderi Áset Isekeshev pen Altaı Kólginov kezdesti, dep habarlaıdy «QazAqparat» tilshisi.
Basqosýǵa sondaı-aq Batys Qazaqstandaǵy iri munaı-gaz operatory - «Qarashyǵanaq Petroleým Opereıtıng b.v.» kompanııasynyń basshylyǵy men Astana qalasyndaǵy birqatar kásiporyn jetekshileri qatysty.
Qatysýshylar «Indýstrııa 4.0» qaǵıdattaryn qoldana otyryp, ındýstrıaldy-ınnovatsııalyq damý men tsıfrlandyrý elementteri jáne «Smart sıtı» kontseptsııasy aıasyndaǵy áriptestiktiń bolashaǵy týraly talqylady. Sondaı-aq básekege qabiletti otandyq ónim óndirýdi damytý úshin jaǵdaı týǵyzý, qyzmet kórsetý sapasyn arttyrý týraly da aıtyldy.
Kezdesý sońynda Astana qalasy men Batys Qazaqstan oblysy ákimdigi arasynda «Indýstrııa 4.0», tsıfrlandyrý jáne «Smart sıtı» kontseptsııasy aıasynda jəne Astana qalasy əkimdigi men «QPO B.V.» kompanııasy arasynda birlesken ınnovatsııalyq jobalardy júzege asyrý jáne ónim túrin keńeıtý maqsatynda Astana qalasynyń shaǵyn jáne orta bıznes bazasynda jańa óndiristerdi qurý týraly memorandýmǵa qol qoıyldy.
Óz sózinde oblys ákimi Altaı Kólginov Astana qalasynyń úlgisinde Oral qalasynda «Smart sıtı» kontseptsııasynyń júzege asyrylýda ekenin aıta kelip:
- Bizdiń basty maqsatymyz - Elbasynyń bıylǵy Joldaýyn júzege asyrý. Astana qalasynda «Smart sıtı» jobasynyń óte joǵary deńgeıde iske asyrylyp jatqanyn kórdik. Birneshe kásiporyndardy araladyq. Sonyń ishinde Astana qalasynda jol júrý erejelerin saqtaýda, qaýipsizdikti qamtamasyz etý baǵytynda atqarylyp jatqan sharalar kóp. Osy tájirıbe bizder úshin de nátıjeli bolady dep oılaımyn. Sondaı-aq «Indýstrııa 4.0» baǵytyna toqtalsaq, Batys Qazaqstan oblysyndaǵy Qarashyǵanaq kompanııasy - elimizdegi eń iri ınvestorlardyń biri. Byltyr bul kompanııamen birge Qazaqstannyń jeti óńirin aralasaq, bıyl Astanadan bastap otyrmyz. Maqsat - Elbasynyń sapaly otandyq ónim shyǵarý jáne jergilikti qamtýdy júzege asyrý týraly tapsyrmasyn oryndaý. Mysaly, byltyrǵy jyly jergilikti qamtý boıynsha Qarashyǵanaq kompanııasy 130 mlrd teńge ınvestıtsııa quıdy. Bıyl da sol jumystar jalǵasyn tappaq. Astana qalasynyń kásipkerlerin tartyp, sapaly otandyq ónim óndirýdi jolǵa qoıǵymyz keledi. Birneshe kelisim-shart jasastyq, - dedi.
