Astanalyq kásipkerler kıim-keshekterdi tegin taratýda
ASTANA. QazAqparat - Elordada «Qaıyrymdylyq. Dobrota» ataýymen eshqandaı baǵa qoıylmaǵan kıim bólimi ashyldy, dep habarlaıdy Astana ákimdiginiń medıa ortalyǵy.
Áleýmettik jobany «Astana Qamqor» JShS dırektory Tımýr Orazaqov bastap otyr. Ol az qamtylǵan otbasy balalary úshin tegin kıim taratatyn býtık ashty.
Qaıyrymdylyq aktsııasy jónindegi ıdeıany áleýmettik jeliler arqyly basqalardyń taǵdyryna beı-jaı qaramaıtyn qala turǵyndary qoldaǵan. Kez kelgen adam arnaıy dúńgirshekke kıim, aıaq kıim, oıynshyqtar, kitaptar ákele alady. Uıymdastyrýshylar tarapynan qoıylatyn bir talap - barlyq kıimder taza jáne útiktelgen bolýy kerek.
«Joba jyl basynda júzege asyryla bastady, biraq qazir óz kıimderimen, zattarymen bóliskisi keletinder kóp. Kún saıyn kıimge muqtaj jandar keledi. Qystyń kúni órtten zardap shekken adamdar da keldi», - deıdi «Kóktal» avtobólshekter bazarynyń meńgerýshisi Erekbolat Qabylda.
Joba uıymdastyrýshylary áleýmettik jobany kásipkerler qoldap, osyndaı oryndardy elorda dúkenderi men bazarlarynda ashady dep senedi.
Astananyń barlyq turǵyny sapasy joǵalmaǵan zattaryn «Qaıyrymdylyq. Dobrota» dúńgirshegine tek demalystan basqa kez kelgen kúni, Kóktal kóshesi 18, mekenjaıy boıynsha ornalasqan «Kóktal» avtobólshekter ámbebap bazaryndaǵy TQO ǵımaratynyń ekinshi qabatyna ákelip, bólise alady.
