Astanalyq K.Ahmetov: «Mereıli otbasy» qazaqstandyqtarǵa úlgi-ónege beretin shara dep bilemin
ASTANA. QazAqparat - «Mereıli otbasy» qazaqstandyqtarǵa úlgi-ónege beretin shara dep bilemin. Bul pikirdi búgin «Mereıli otbasy» ulttyq konkýrsyna qatysýshy elordalyq Kendaı Ahmetov bildirdi.
«Mereıli otbasy» baıqaýy óshkenimizdi jandyryp, umytqanymyzdy eske túsiretin, halqymyzdy tatýlyq pen birlikke, yntymaqqa shaqyratyn, qazaqstandyqtarǵa úlgi-ónege beretin shara dep bilemin. Bul baıqaýdyń adamgershilik qundylyqtardy jáne neke men otbasynyń jaǵymdy obrazyn qalyptastyrýdaǵy mán-maǵynasy erekshe. Osyndaı baıqaý uıymdastyryp, otbasy qundylyqtaryn dáripteýge barlyq jaǵdaı jasap otyrǵan Elbasymyzǵa aıtar alǵysymyz da sheksiz. Qazaqstanymyz, elimiz kórkeısin, kók baıraǵymyz árkezde de joǵarydan kórinsin dep tileımin», - deıdi K.Ahmetov.
Ahmetovter otbasy - ataqty temirjolshylar áýleti. Áýletten 63 kisi temir jol salasynda qyzmet atqarǵan, kóptegen marapattarǵa ıe bolǵan. Áýlet basshysy Kendaı Ahmetov 1969 jyldan bastap temir jol salasynda eńbek etedi.
Aıta keteıik, búgin elordadaǵy «Qazaqstan» ortalyq kontsert zalynda Elbasy Nursultan Nazarbaevtyń qatysýymen «Mereıli otbasy» ulttyq konkýrsynyń jeńimpazdaryn marapattaý rásimi ótedi. Marapattaý rásimine aımaqtyq týrlardan jeńip shyqqan 16 otbasy qatysady. Jalpy, konkýrsta elimizdiń barlyq óńirlerinen 1 298 otbasy baq synaǵan bolatyn.
