Astanalyq fýtbolshylardyń qosalqy quramy Rýmynııanyń «Astra Djýrdjý» klýbynan oısyraı utyldy
ALMATY. 24 aqpan. QazAqparat - Túrkııada oqý-jattyǵý jıynyn ótkizip jatqan «Astana» fýtbol klýbynyń qosalqy quramy keshe Antalııada «Astra Djýrdjý» klýbymen joldastyq kezdesý ótkizdi.
Djýrdjý qalasynyń bul komandasy 2011/12 jyly Rýmynııa chempıonatynyń Ekinshi dıvızıonynda 8-orynda kele jatyr. Vladımır Glevıch jattyqtyratyn astanalyqtar bul oıynda qarsylastarynan 0:4 esebimen oısyraı utyldy. Buǵan deıin negizgi quramanyń Bas bapkeri Oleg Protasov ulttyq quramadan shaqyrtý alǵan 10 fýtbolshynyń ornyn qosalqy quramdaǵy 10 oıynshymen tolyqtyrǵan edi. Ol atalmysh oıynǵa óz yqpalyn tıgizdi. Jalpy bul qosalqy quramnyń osy jıyndaǵy 3-shi joldastyq kezdesýi bolyp otyr. Olar 21 aqpanda Senegal, Nıgerııa jáne Gananyń 20-25 jastaǵy qurama komadasymen kezdesken bolatyn. Onda Afrıka fýtbolshylarynan 1:3 esebimen jeńilis tapqan edi. Kelesi joldastyq kezdesýin olar endi 26 aqpanǵa josparlap otyr. V. Glevıch shákirtteriniń jattyǵý jıyny 14 aqpanda bastalǵan edi, ol 29 aqpanǵa deıin sozylmaq.
