Astanalyq emhanalardan sábılerge arnalǵan arbalardy urlaýmen aınalysqan qyz ustaldy
ASTANA.KAZINFORM - Astanada sábılerge arnalǵan besik arbalaryn urlaýmen aınalysqan 24 jastaǵy qyz ustaldy, dep málimdeıdi Astana qalalyq ishki ister basqarmasy.
«Uıymdasqan izdeý sharalary barysynda qala aýmaǵynda besik arbalaryn urlady degen kúdikpen 24 jastaǵy qyz ustaldy. Ol qalalyq emhanalarda analardyń arbalardy dálizge qaraýsyz qaldyrǵan sátin kútip, sol mezette óz oıyn iske asyryp otyrǵan. Ustalǵan azamatshanyń osyndaı 4 urlyqqa qatysy bar ekeni anyqtaldy», - delingen habarlamada.
Aıta keterlik jáıt, kúdikti tek qymbat turatyn arbalardy urlap, olardyń óziniń dostary men tanystaryna syılaıtyn bolǵan. Kúdikti óz qylmystaryn tolyǵymen moıyndady, urlanǵan arbalar óz ıelerine qaıtaryldy.
Qazirgi ýaqytta QR QK 188-baby boıynsha sotqa deıingi tergeý jumystary júrgizilýde. Qylmyskerdiń qala aýmaǵynda osyǵan uqsas ózge de qylmystarǵa qatystylyǵy tekserilip jatyr.
Astana qalalyq ishki ister departamenti aıyptalýshynyń quqyq buzýshylyq áreketterinen zardap shekken turǵyndardan Aqbuǵa 2 mekenjaıynda ornalasqan «Saryarqa» aýdandyq ІІB-na habarlasýlaryn nemese kórsetilgen nómirlerge: 8 (7172) 71-66-76, 71-66-74 ne 102 qońyraý shalýlaryn suraıdy.
