Astanalyq eki polıtseı sýǵa kete jazdaǵan adamdy qutqarǵany úshin marapattaldy
NUR-SULTAN. QazAqparat - QR Іshki ister mınıstri Erlan Turǵymbaev astanalyq eki polıtseıdi «Sýǵa batyp bara jatqandardy qutqarǵany úshin» medalimen marapattady, dep habarlaıdy QazAqparat elordalyq polıtsııa departamentine silteme jasap.
Jol-patrýldik polıtsııasy polkiniń platsynda polıtsııa aǵa leıtenanty Dáýlet Ábýovti jáne polıtsııa leıtenanty Rýslan Búrkitbaevty saltanatty jaǵdaıda marapattady.
«Oqıǵa 26 naýryzda bolǵan. Esil ózeninde sýǵa batyp bara jatqan er adam týraly aqparatty «Talas 201» patrýlderi qabyldaǵan. 5 mınýt ótkennen keıin polıtseıler oqıǵa ornyna kelgen. Polıtseıler TJK qyzmetkerlerimen birge qutqarý sharalaryn júrgizip, muzdaı sýdan er adamdy alyp shyqqan.
Іshki ister mınıstri Erlan Turǵymbaevqa aman qalǵan er adamnyń qyzy polıtseılerge alǵys bildirgen haty kelip tústi», delingen habarlamada.
Aınur Imanálıeva ІІM basshylyǵyna jazǵan hatynda týysqandary men jaqyndarynyń atynan onyń ákesin qutqarý kezinde batyldyq kórsetken polıtseılerdi marapattaýdy suraǵan. Marat Imanalıev pen onyń qyzy elordalyq Jol-patrýldik polıtsııasy polkine kelip, ómirin saqtap qalǵany úshin polıtseılerge shyn júrekten rızashylyq bildirdi. Polıtseılerdiń batyl jáne kásibı áreketteriniń arqasynda ol óziniń aman qalǵanyn aıtty.
Polıtsııa departamenti bastyǵynyń orynbasary Baqytjan Malybaev polıtseılerge medaldy tabystaı otyryp, adam ómirin qutqaryp qalý kezinde batyldyq tanytqandary úshin olarǵa alǵys bildirip, aldaǵy ýaqytta óz qyzmettik boryshyn adal oryndaýǵa shaqyrdy.
Eske sala ketsek, Almaty oblysynda órtengen úıden eki adamdy qutqarǵan polıtseıler QR ІІM TJK tóraǵasynyń alǵys hatymen marapattalǵan bolatyn.
