Astanalyq daıashy óziniń sýretin ruqsatsyz paıdalanǵan túngi klýbtan 350 myń teńge óndirip almaq
ASTANA. QazAqparat - Astana turǵyny ózi jumys istegen elordadaǵy «MrBingo» klýbynan 350 myń teńge óndirip almaq. Bul týraly QazAqparat Astana qalalyq sotynyń baspasóz qyzmetine silteme jasap habarlaıdy.
«Astana turǵyny elordadaǵy «MrBingo» klýbynda daıashy bolyp 1 aı jumys istegen. Sosyn óz erkimen jumystan shyǵyp ketken. Keıinnen ol álgi klýbtyń aldynda óziniń daıashy kıimimen túsken sýreti bar bannerdi kezdeısoq kórip qalady. Bannerdegi sýret onyń kelisiminsiz ornatylǵan bolyp shyqty», - dep habarlaıdy baspasóz qyzmeti.
Qazaqstan Respýblıkasynyń zańyna sáıkes, qandaı da bir tulǵanyń sýretin onyń kelisiminsiz paıdalanýǵa, jarııalaýǵa eshkimniń quqy joq. Al eger sýrette beınelengen tulǵa qaıtys bolǵan bolsa, ruqsat onyń zańdy muragerinen alynýy kerek.
«Astana qalasy Almaty aýdandyq soty shaǵymdanýshynyń aryzyn qarap, moraldyq shyǵyny úshin klýbtan 350 000 teńge óndirý týraly sheshim shyǵardy. Sot sheshimi zańdy kúshine engen joq», - delingen baspasóz baıanynda.
