Astanalyq dárigerler sport chellendjine qatysty
NUR-SULTAN. QazAqparat - Elordada medıtsına salasynyń qyzmetkerleri «Juldyzdy júgirý» sport chellendjine qatysty, dep habarlaıdy QazAqparat tilshisi.
Uıymdastyrýshylardyń aıtýynsha, sharanyń maqsaty - turǵyndardy dene shynyqtyrý jáne ashyq aspan astynda sportpen aınalysýǵa shaqyrý.
«Júgirý - megapolıs turǵyndary úshin deneni shynyqtyrýdyń eń qoljetimdi ári tanymal tásilderiniń biri. Árkimniń densaýlyǵy - óz qolynda, ony saqtaý qajet. Astanalyqtar arasynda salaýatty ómir saltyna degen betburys qýantady», - deıdi Qoǵamdyq densaýlyq saqtaý ulttyq ortalyǵy dırektorynyń orynbasary Damır Kópjasarov.
Sharaǵa bodıbıldıngten Qazaqstan chempıonatynyń qola medal ıegeri, Ortalyq Azııa chempıonatynda úzdikter bestigine kirgen bodıbılder ári paýerlıftıngten Nur-Sultan qalasynyń altyn júldegeri Ázıza Talpaqova qatysty. «Qazaq Batyry» jeke kúrester akademııasynyń kásibı bapkerleri jattyǵýlar ótkizdi.
«Búgingi jattyǵýǵa balalardyń kóptep qatysqany qýantady. Óıtkeni salaýatty ómir saltynyń negizi bala kúnde qalanady», - deıdi Nur-Sultan qalasy Qoǵamdyq densaýlyqty saqtaý basqarmasynyń basshysy Marat Shoranov.
Ol chellendjdi kásibı merekesin toılap otyrǵan Nur-Sultan qalasynyń Іshki ister departamentine tapsyrdy.
Shara Jastar jyly aıasynda ótkizildi.
Ony uıymdastyrýǵa Qoǵamdyq densaýlyq saqtaý ulttyq ortalyǵy, Nur-Sultan qalasynyń Memlekettik qyzmet isteri agenttiginiń departamenti jáne qala ákimdiginiń «Astana jastary» resýrs ortalyǵy atsalysty.
Avtor: Aqbota Kúzekbaı
