Astanalyq dárigerler naýqasqa biregeı ota jasady

ASTANA. QazAqparat - Astanada №3 kópbeıindi qalalyq aýrýhananyń mamandary platsentanyń tolyq aýytqýymen ornalasýy baıqalǵan naýqasqa biregeı ota jasady, dep habarlaıdy QazAqparat elorda ákimdiginiń resmı saıtyna silteme jasap.

Mundaı jaǵdaıda qan ketýdiń, ana men bala óliminiń qaýpi joǵary. Sońǵy ýaqytqa deıin dál mundaı dıagnozdan keıin patsıentter bosanǵannan soń jatyryn alyp tastaıtyn. Biraq 2015 jyldan bastap 3 KQA-nyń akýsherlik blogyna medıtsına ǵylymynyń kandıdaty, AMÝ-diń Akýsherııa jáne gınekologııa kafedrasynyń meńgerýshisi Zaıtýna Hamıdýllınanyń jetekshiligimen aǵzany saqtap qalý operatsııasynyń tehnıkasy engizildi.

Aıta ketý kerek, mundaı operatsııalar búginde álemniń birneshe klınıkasynda ǵana jasalady.

Patsıent júktilik kezinde dıagnozy týraly bilip, 3 KQA-daǵy ortalyqqa júgingen. 34 apta ishinde qan ketken naýqasqa joǵary sanatty akýsher-gınekolog, PhD doktory Aıgúl Dúısembaeva ota jasady. Dáriger kúni búginge deıin dál osyndaı 15 ota jasaǵan.

Operatsııalyq top 3 akýsher-gınekolog, 2 ýrolog, 2 hırýrg, 2 anestezıolog, 2 operatsııalyq meıirbıkeden quralǵan.

Operatsııa 2,5 saǵatqa sozylyp, sátti ótti.

Búgingi tańda ana men balanyń ómirine qaýip tónip turǵan joq, ekeýi de otadan keıingi erte qalpyna keltirý kezeńinde.