Astanalyq dárigerler Arystaǵy jarylystan zardap shekken balalardyń jaǵdaıy týraly aıtyp berdi
«28 maýsym kúni túngi saǵat 00:10-de Arys qalasynan sanavıatsııa qyzmetimen 2005 jáne 2011 jyly dúnıege kelgen eki bala bizdiń aýrýhanaǵa jetkizildi. Eki bala da bas jáne keýde tusynan jaraqat alǵan. Bizge kelip túskende ekeýi de es-tússiz kúıde boldy. Osyndaǵy dárigerlerdiń shuǵyl áreketiniń nátıjesinde ota jasaldy. Qazirgi tańda 2005 jyly dúnıege kelgen jasóspirimniń jaǵdaıy jaqsardy. Balanyń beti beri qarap, tolyq em alǵannan keıin ol aýrýhanadan shyǵaryldy», - dedi №2 Nur-Sultan qalalyq balalar aýrýhanasy bas dárigeriniń orynbasary Aıdyn Áshimhanov.
Onyń aıtýynsha, ekinshi naýqas aýyr halde qalyp otyr.
«Ekinshi bala 2005 jyly dúnıege kelgen. Onyń jaǵdaıy búginde aýyr, ol mı jaraqatyn alǵan. Naýqas áli esin jıǵan joq, arnaıy qurylǵymen ǵana demalyp jatyr. Biz óz tarapymyzdan qajetti em-sharany qoldanýdamyz. Ózimizdiń beldi mamandarmen qatar, balanyń janyn saqtap qalý maqsatynda Reseıden arnaıy neırohırýrg mamandar shaqyryldy. Balany sıstema arqyly tamaqtandyrýdamyz. Sondyqtan onyń densaýlyǵynyń jaqsarýy tek ýaqyt enshisinde», - dedi ol.
Buǵan deıin habarlaǵanymyzdaı, búgin QR Densaýlyq saqtaý mınıstri Eljan Birtanov Ortalyq kommýnkatsııalar qyzmetinde ótken baspasóz máslıhaty barysynda Arystaǵy jarylystan zardap shekkenderdiń qazirgi jaǵdaıy týraly aıtyp ótken bolatyn.
«Arystaǵy tótenshe jaǵdaı kezinde jaralanǵandardyń basym bóligi jazylyp shyqty. Qazir 3 naýqas qana aýrýhanada jatyr. Bireýi - Almatyda, taǵy bireýi - Shymkentte, úshinshisi Nur-Sultan qalasynda jatyr. Almaty men Shymkenttegi ekeýdiń jaǵdaıy ońalyp keledi. Meniń oıymsha, jaqynda jazylyp shyǵady. Al Nur-Sultan qalasyndaǵy balanyń jaǵdaıy ózgerissiz», - dedi ol.
