Astanalyq «Tsesnabankti» jer astynan qazylǵan tonnel arqyly tonamaq bolǵan kúdiktilerdiń bireýi ustaldy
ASTANA. Qarashanyń 30-y. QazAqparat /Jasulan Amanbaıuly/ - Astanalyq «Tsesnabankti» jer astynan qazylǵan tonnel arqyly tonamaq bolǵan qylmyskerlerdiń bireýi ustaldy. Bul týraly búgin brıfıng barysynda ІІM-niń Til saıasaty jáne aqparat departamentiniń bastyǵy Qýanyshbek Jumanov málim etti,
dep habarlaıdy QazAqparat.
Ótken aıda «Tsesnabank» AQ-nyń astanalyq fılıalyna jer astynan qazylǵan tonnel arqyly tonaý áreketi jasalǵan bolatyn. Habarlanǵanyndaı, qaskúnemder bank ǵımaratynyń mańynda ornalasqan turǵyn úılerge tıesili garajdardyń arasynan bankqa alyp baratyn jer asty tonnelin qazǵan.
Qylmyskerler bankty tonaý isine aldyn ala jiti daıyndalǵanǵa uqsaıdy. Óıtkeni, qazylǵan tonneldiń uzyndyǵy 70 metrden astam, al onyń bıiktigi adam boıymen birdeı. Topyraq shyǵaratyn relster men arnaıy metall qurylǵylarmen jabdyqtalǵan. Sondaı-aq tonnelge elektr jaryǵy tartylǵan.
«Ustalǵan kúdikti 2008 jyly mamyr-shilde aılarynda atalmysh bankte depozıtarııdi jalǵa alý týraly kelisimshartqa otyrǵan. Ustalǵannyń aıtýynsha, depozıtarıı tonneldiń baǵytyn anyqtaýǵa jáne arnaıy lazer qurylǵysyn paıdalana otyryp, sońǵy núkteni qazý úshin jalǵa alynǵan. Sonymen qatar ol tonneldi ótken jyldyń tamyzdyń 8-inen bastap qazyp, topyraqty qaptarǵa salyp, óziniń «Nıssan Sannı» avtomashınasymen qalanyń qoqys konteınerlerine aparyp tókken. Aldyn ala esepteý boıynsha, 15 aıdyń ishinde kúdikti 118 tekshe metr, ıaǵnı 200 000 tonnaǵa jýyq topyraqty, shamamen 4 myń qapqa salyp shyǵarǵan», deıdi Q. Jumanov.
Banktyń dabyl qaǵý júıesi bank ǵımaratyna ený sátinde qaǵylǵandyqtan, qylmyskerlerdiń «ǵasyr tonaýyn» jasaý áreketi iske aspady.
Qazirgi ýaqytta quqyq organdary tonaý áreketin egjeı-tegjeı tekserip, qalǵan qylmyskerlerdi izdestirý ústinde.
