Astanalyq «Tsesnabankti» tonaý áreketi Qazaqstanda buryn-sońdy bolmaǵan oqıǵa
ASTANA. Qarashanyń 30-y. QazAqparat /Jasulan Amanbaıuly/ - Astanalyq «Tsesnabankti» jer astynan qazylǵan jol arqyly tonamaq bolǵan qylmysker ustaldy.
Búgin bul oqıǵaǵa aptalyq brıfıng barysynda Astana qalalyq ІІD bastyǵynyń birinshi orynbasary Arman Orazalınov túsinikteme berdi, dep habarlaıdy QazAqparat.
Qylmysker 1978 jyly týǵan Astana qalasynda turatyn, esh jerde jumys istemeıtin eýropa násildi azamat bolyp shyqty. Ol óz kinásin tolyq moınyna alyp otyr.
Ótken aıda «Tsesnabank» AQ-nyń astanalyq fılıalyna jer astynan qazylǵan jol arqyly tonaý áreketi jasalǵan bolatyn. Habarlanǵanyndaı, qaskúnem bank ǵımaratynyń mańynda ornalasqan turǵyn úılerge tıesili garajdardyń biriniń astynan bankqa alyp baratyn jer asty jolyn qazǵan. Qylmysker bankty tonaý isine aldyn ala daıyndalǵanǵa uqsaıdy. Óıtkeni, qazylǵan joldyń uzyndyǵy 75 metr, al onyń bıiktigi adam boıymen birdeı.
Ustalǵan azamattyń aıtýynsha, bank tonaý týraly oı kabeldik telearnalardyń birinde Brazılııada jerasty joldaryn qazý arqyly qylmyskerler bankten 80 mln. dollardy urlaǵany týraly derekti fılmdi kórgennen keıin kelgen.
«Bankti osyndaı jolmen tonaý áreketi Qazaqstanda buryn-sońdy bolmaǵan oqıǵa», deıdi Astana qalalyq ІІD bastyǵynyń birinshi orynbasary A. Orazalınov.
Onyń atap kórsetkenindeı, ustalǵan kúdikti 2008 jyly mamyr-shilde aılarynda atalmysh bankte depozıtarııdi jalǵa alý týraly kelisimshartqa otyrǵan. Depozıtarıı jer asty jolynyń baǵytyn anyqtaýǵa jáne arnaıy lazer qurylǵysyn paıdalana otyryp, sońǵy núkteni belgileý úshin jalǵa alynǵan.
Topyraq shyǵaratyn relster men arnaıy metall qurylǵylaryn saılap alǵan. Sondaı-aq tonnelge elektr jaryǵy tartylǵan. Ol qazý jumysyn ótken jylǵy tamyzdyń 8-inen bastap, topyraqty qaptarǵa salyp, óziniń «Nıssan Sannı» avtomashınasymen qalanyń qoqys konteınerlerine aparyp tókken.
Aldyn ala esepteý boıynsha, 15 aıdyń ishinde kúdikti 118 tekshe metr, ıaǵnı 200 000 tonnaǵa jýyq topyraqty, shamamen 4 myń qapqa salyp shyǵarǵan. Banktyń dabyl qaǵý júıesi bank ǵımaratyna ený sátinde qaǵylǵandyqtan, qylmyskerlerdiń «ǵasyr tonaýyn» jasaý áreketi iske aspady.Qazirgi ýaqytta quqyq qorǵaý organdary tonaý áreketin egjeı-tegjeıli tekserip, qalǵan qylmyskerlerdi izdestirý ústinde.
Onyń jasaǵan qylmysy dáleldense, 6 jylǵa deıin bas bostandyǵynan aıyrý jazasy kútip tur.
