Astanalyq búldirshinder jyl sońyna deıin balabaqshamen tolyq qamtylady
NUR-SULTAN. QazAqparat - Ústimizdegi jyldyń sońyna deıin astanalyq búldirshinder 100% mektepke deıingi bilim berýmen qamtamasyz etiledi. Bul týraly ákimdikte ótken qalalyq máslıhat otyrysynda Nur-Sultan qalasy Bilim basqarmasynyń basshysy Ánýar Janǵozın aıtty, dep habarlaıdy QazAqparat tilshisi.
«Búginde qaladaǵy balabaqshalarda 2 100 beınebaqylaý kamerasy ornatyldy, olardyń barlyǵy «iKomek» ortalyǵynyń baqylaýynda. Balalardyń qaýipsizdigin qamtamasyz etý maqsatynda balabaqshalarda taǵy 2 myń beınebaqylaý ornatý kerek. Bul jumysty ákimniń tapsyrmasyna sáıkes jyldyń sońyna deıin aıaqtaýymyz qajet», - dedi Á.Janǵozın.
Bilim basqarmasy basshysynyń deregine súıensek, búginde qala boıynsha 375 mektepke deıingi bilim berý mekemesinde 58 myń tárbıelenýshi bilim alýda.
«Ótken jyly 2 jastan 6 jasqa deıingi balalardy balabaqshamen qamtý 78%-dy quraǵan, osy jyly 90%-dy qurap otyr. Onyń ishinde 36%-y memlekettik tapsyryspen bilim beretin jekemenshik balabaqshada tárbıelenýde. Osy kóktemde balabaqshalardan 7 myń tárbıelenýshi mektepke jol tartady, tıisinshe olardyń ornyna basqa 7 myń bala keledi. Osylaısha jyl sońyna deıin, elorda búldirshinderin mektepke deıingi bilim berýmen 100% qamtymaqpyz», - dedi ol.
Aıta ketsek, buǵan deıin Á.Janǵozın bas qalada tegin balabaqsha týraly aqparatty qaıdan, qalaı alýǵa bolatynyn aıtyp bergen bolatyn.
