Astanalyq boksshylar Qazaqstannyń boks federatsııasy kýbogynyń jartylaı fınalyna shyqty

Bul týraly astana.kz saıtyna elordalyq Týrızm, dene shynyqtyrý jáne sport basqarmasynyń baspasóz qyzmetinen habarlady.

Eske salsaq, 19-21 shilde aralyǵynda «Dáýlet» SK elordalyq bylǵary qolǵap sheberleri Pavlodar, Shyǵys Qazaqstan jáne Almaty oblystarynyń komandalarynan basym túsken bolatyn. Bıyl tórtinshi ret ótkizilip otyrǵan Qazaqstannyń boks federatsııasynyń kýbogy bokstyń jańa erejeleri boıynsha uıymdastyryldy,sondaı-aq jarystyń reglamenti de ózgertilip, úsh kezeńge deıin qysqartyldy.

«Birinshi jekpe-jekte boksshylarymyz 8:2 esebimen Pavlodar oblysynyń komandasyn oısyratty, al Almaty oblysynyń ókilderi ShQO sportshylaryn jeńdi - 7:3. Týrnırdiń ekinshi kúninde astanalyqtar 9:1 esebimen shyǵysqazaqstandyq sportshylardy tizerletti, Almaty oblysynyń quramasynan osyndaı eseppen jeńilgen pavlodarlyqtar jartylaı fınalǵa shyǵa almady. Jarystyń sońǵy kúni kósh bastaǵan komandalar kelesi kezeńge joldamany sarapqa saldy», - delingen Týrızm, dene shynyqtyrý jáne sport basqarmasynyń baspasóz qyzmeti taratqan habarlamada.

Alǵashqy úsh kezdesýde jeńil salmaq sanattarynda elordalyq sportshylar jeńiske jetti. Azat Kamzın Mardan Berikbaevtan basym tústi. 52 keli salmaq dárejesindegi QR quramasynyń kóshbasshysy Іlıas Súleımenov ekinshi raýndta Ernar Órkendi tehnıkalyq nokaýtqa jiberip, jekpe-jekti ýaqytynan buryn aıaqtady. «Astana Arlans» sapynda óner kórsetip júrgen 56 kelige deıingi salmaqta Meıirbolat Toıytov Dıdar Ótelbaevtan aılasyn asyryp, kórermenderdi bir qýantty. Qarsy komandanyń eki ókili Bekman Soılybaev pen Bekbolat Quramysov, sáıkesinshe Darhan Jumsaqbaev pen Dáýlet Dáýkenovty jeńdi. 69 kelige deıingi salmaqta Meıirim Nursultanov elordalyq komandanyń basymdyǵyn arttyra túsip, Baǵdat Naýqanovpen ótkizgen jekpe-jekte jeńimpaz atandy. Kútpegen jerden Baqytjan Qojabekov Aıdos Erbolsynulynan jeńilip qaldy. 81 kelige deıingi salmaqta Dáýren Eleýsinov Arman Rysbekti jeńse, aýyr salmaqta jarysqa túsetin astanalyq sportshy Vasılıı Levıt 3:0 esebimen Arbek Ábdýǵanıevten basym tústi. Sońǵy kezdesýde Dáýlet Musabaev Ermek Úsenovti utty. Astana komandasy Qazaqstan boks federatsııasynyń jartylaı fınalyna birinshi bolyp shyqty.

Bul kezeńde baq synasatyn taǵy eki komanda 24 shildede Shymkentte «Ońtústik» dıvızıonynda, 29 shildede Aqtóbe men Qaraǵandyda «Batys» jáne «Soltústik» dıvızıondarynda anyqtalady.

Jartylaı fınal men aqtyq kezdesýler jeltoqsan aıynda Astanada ótedi.