Astanalyq boks mektebiniń alǵashqy álem chempıonyn elorda jurtshylyǵy áýejaıda saltanatpen qarsy alady
ASTANA. 16 qyrkúıek. QazAqparat - Kıev qalasynda ótken jastar arasyndaǵy Álem birinshiliginde (Ýkraına, 9-15 qyrkúıek) Qazaqstan sportshylarynyń qorjynyna 2 altyn, bir kúmis jáne 5 qola medal tústi. Jalpy komandalyq esepte qazaqstandyq boksshylar Reseı men Kýbadan keıingi úshinshi oryndy enshiledi.
Álem birinshiliginiń trıýmfatorlarynyń biri astanalyq boksshy Rahat Marjyqpaev boldy! Bul - astanalyq boks mektebiniń tarıhyndaǵy birinshi álem chempıony. Ol 66 kg salmaqta óner kórsetti. Rahat aqtyq synda óziniń ázirbaıjandyq qarsylasynan basym tústi. Sport sheberligine úmitker (endi oǵan Qazaqstan Respýblıkasynyń sport sheberi ataǵy beriledi) Rahat Marjyqpaev bıylǵy jyly óz salmaq dárejesi boıynsha Azııa chempıony bolǵanyn esterińizge salamyz.
Erteń tańerteń elorda jurtshylyǵy astanalyq boks mektebiniń alǵashqy álem chempıonyn áýejaıda saltanatpen qarsy alady.
