Astanalyq batyr ana onynshy balasyn bosanýǵa óz kóligimen barǵan (FOTO)
ASTANA. QazAqparat - Toǵyz qursaq kótergen astanalyq kóp balaly batyr ana Uldanaı Álimbaeva onynshy balasyn bosanýǵa perzenthanaǵa jedel járdemmen emes, rólge ózi otyryp, kóligimen barǵan. Aman-esen aıaq-qolyn baýyryna alǵan kelinshek, dárigerlerdiń qaraýynda tek bir kún ǵana jatty, dep jazady «Astana aqshamy» gazetiniń tilshisi Ádilbek Japaq.
«Astanalyq Uldanaı Álimbaeva onynshy perzentin aman-esen bosandy. Dúnıege kelgen shekesi torsyqtaı uldyń esimin Jangeldi dep qoıypty. Sábıdiń salmaǵy - 4 keli 700 gramm, boıy - 58 santımetr. Dárigerler ananyń da, náresteniń de densaýlyǵy óte jaqsy deıdi. Eń qyzyǵy, toǵyz qursaq kótergen astanalyq kóp balaly batyr ana Uldanaı perzenthanaǵa bosanýǵa jedel járdemmen emes, ózi rólge otyryp, kóligimen bardy. Al, Jangeldini qyrqynan shyǵarǵan soń, jumysqa kirisemin dep josparlap otyr», deıdi basylym tilshisi.
Aıta ketý kerek, «Astana aqshamy» gazeti «Kúnde kezdese bermeıtin keıipker» aıdarymen kóp balaly otbasy týraly basylymnyń 7 tamyz, 2014 jylǵy №87 sanynda «Ulyń bolsyn onshaqty, qyzyń bolsyn monshaqty» degen taqyrypta arnaıy maqala arnaǵan bolatyn. Onda «Astana palaý ortalyǵynyń» ıesi Uldanaı Álimbaeva men onyń joldasy Ábdikárim Álimbaev otbasy týraly keńirek jazyldy. «Astanaǵa 2004 jyly kóship kelgen edik. Ábdikárim kishigirim qurylys fırmasyn quryp, qalanyń kórkeıýine atsalysýda. Tórt balamen keldik, kelgeli bes qursaq kóterdim», - deıdi suhbatynda ismer, kásipker kelinshek.
