Astanalyq basshylar birneshe saǵatqa qaıtadan oqýshy atandy
Elorda ákimdiginiń basshylary búgin mańyzdy keńes ornyna mektep sabaǵyna, resmı qujattar ornyna qoldaryna jazba dápter aldy. Al olarǵa bilimdi joǵary synyp oqýshylary berdi. Sabaq ádettegi keste boıynsha 8:30-da bastaldy jáne birinshi sabaq taqyryby «Meniń alǵashqy ustazym» taqyrybyna shyǵarma jazý.
«Bul sabaqqa qýanyshpen bardym jáne balalyq shaǵyma saıahat jasadym. Men Tselınograd qalasynda 11 jyldyq mektepti támamdadym. Maǵan bastaýysh synyptaǵy kezimdi eske alý óte qyzyqty, meniń alǵashqy ustazym Galına Saveleva. Óte meırimdi jan jáne óz isiniń sheberi. Átteń alǵashqy jazǵan shyǵarmamdy bilmeımin. Biraq jazǵan shyǵarmalarym jyl saıyn synyptan synypqa kóship júrdi, birde ózimniń shyǵarmalarym jazylǵan dápterimdi ózimnen 5 jas kishi qaryndasymnyń qolynan kórdim. Al ol dápterdi qaryndasyma mekteptegi qurbysy beripti», - dep óz oıymen bólisti máslıhat depýtaty Mıras Shekenov sabaqtan soń.
Sondaı-aq, partaǵa otyrǵan oqýshylar qatarynda bilim basqarmasynyń basshysy Ánýar Janǵozın, mádenıet jáne sport basqarmasynyń basshysy Bolat Majaǵulov, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń basshysy Jazıra Jylqyshıeva, «iKomek» ortalyǵynyń jetekshisi Jannat Dýbırova, «Astana Konvenshn Bıýro» dırektory Sanııar Aıtekenov bar.
«Men úshin bul qyzyqty jáne úlken tájirıbe boldy. Barlyq tapsyrma uqyptylyqqa quryldy, sońynda biz alǵashqy ustaz, súıikti pedagog týraly shyǵarma jazdyq. Depýtattar men basqarma basshylarymen tanysýǵa múmkindik týdy. Munda esh qobaljymadym, aldymda jaı ǵana oqýshylar otyr dedim, olar da oqýshy bolǵan, olar da biz sııaqty partada otyrǵan, ózderiniń súıikti ustazy men jaqsy kóretin páni bolǵan jáne árqaısysy mektep tabaldyryǵyn attap túlep ushqan. Jylyna bir ret oryndarymyzdy almastyrýǵa bolady», - deıdi bir kúndik ustaz Aıbol Qubaev.
Aıta keteıik, bul bastama bilim basqarmasynyń bastamasymen alǵash ret ótip otyr.
«Osy iske qoldaý bildirgen áriptesterime úlken rahmet. Osy jazylǵan shyǵarmalar bizdiń jolymyz mektepten bastalǵanynyń belgisi retinde mektep qabyrǵasynda qalady», - dedi bilim basqarmasynyń basshysy Ánýar Janǵozın.
