Astanalyq «Barystyń» taǵy 8 múshesinen koronavırýs anyqtaldy

NUR-SULTAN. QazAqparat - Hokkeıden astananyń «Barys» komandasynyń taǵy 8 múshesi koronavırýs juqtyrǵany belgili boldy, dep habarlaıdy QazAqparat tilshisi.

«Eńbek ujymdarynda koronavırýs indetiniń taralýy alańdatyp otyr. Naqtyraq aıtqanda, osy jyldyń 17 qyrkúıeginde «Barys» hokkeı komandasyndaǵy 40 adamǵa profılaktıkalyq jumystar júrgizildi. Onyń ishinde 11 adamnyń koronavırýs juqtyryp alǵany belgili boldy. Dál sol kúni qalanyń bas sanıtarlyq dárigeriniń qaýlysy shyǵyp, sol ujymda epıdemıologııalyq sharalardy ótkizý týraly sheshim qabyldandy. KVI juqtyrǵandarmen baılanysta bolǵan 29 adam anyqtaldy. Bárine de «Barys-Arenaǵa» kelýge tyıym salyndy», - dedi búgin QR Densaýlyq saqtaý mınıstrliginiń baspasóz hatshysy Baǵdat Qojahmetov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, 22 qyrkúıekte komandanyń taǵy 8 múshesinen koronavırýs (olar buryn juqtyrǵandarmen baılanysta bolǵan) anyqtalǵan.

«Qazir komandadaǵy koronavırýs juqtyrǵan 19 adamnyń bári aýrýdy sımptomsyz ótkerip jatyr. Ózderińiz kórip otyrǵandaı, bul indetti balalar men qarapaıym adamdar ǵana emes, densaýlyǵy myǵym sportshylar da juqtyrýda», - dedi ol.

Eske sala ketsek, buǵan deıin «Barys» hokkeı klýbynyń birneshe oıynshysynan koronavırýs anyqtalǵan edi. Osyǵan baılanysty hokkeı klýby aldaǵy kezdesýlerin keıinge shegerýge májbúr bolyp otyr.