Astanalyq balalar sýǵa júzýge mashyqtanbaǵan
ASTANA. QazAqparat - Ótken jyly jazǵy demalys kezinde 99 bala sýǵa ketip, mert boldy. Bul týraly búgin Úkimet otyrysynda QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Jazǵy ýaqytta balalardyń qaýipsizdigin qamtamasyz etý qajet. Byltyr balalarǵa qatysty bolǵan oqıǵalardyń negizgi sebepteri ata-analardyń durys baqylamaýy jáne qaýipsizdik sharalaryn saqtamaýy bolyp sanalady. Onyń ishinde arnaıy nazar aýdaratyn másele - shomylý maýsymy. Ótken jyly 99 bala sýǵa ketken»,- dedi mınıstr.
Erlan Saǵadıevtiń aıtýynsha, osyǵan baılanysty mınıstrlik Іshki ister mınıstrligimen birge balalardy júzýge úıretýdi uıymdastyrý jónindegi vedomtsvoaralyq jospar qabyldaǵan. Onyń negizinde árbir mektepte júzý basseıni bekitilip, júzýdiń negizin úıretý kózdelgen.
«Osy josparǵa sáıkes respýblıka boıynsha 1-10 synypta oqıtyn balalardyń júzý negizin úırenýge qatysý kórsetkishi 5 paıyzǵa ósip, 15 paıyzǵa jetti. Biraq, oblys arasyndaǵy aıyrmashylyq kórinip otyr. Eń joǵary kórsetkish Qaraǵandy oblysynda 70 paıyz bolsa, eń tómengi kórsetkish Almaty, Jambyl oblystarynda jáne Astana qalasynda 1-2 paıyz ǵana. Óte mańyzdy másele. Ákimderdiń osyǵan nazar aýdarýyn suraımyn»,- dedi ol.
Aıta keterligi, Erlan Saǵadıev sonymen qatar balalardyń qaýipsiz demalysyn qamtamasyz etý úshin qabyldanýy tıis sharalardy da atap ótken bolatyn.
