Astanalyq balalar mektepke onlaın tártippen qabyldanady
ASTANA. QazAqparat -Elorda ákimdigi aldaǵy jyldan bastap balalardy mektepke qabyldaý qyzmetin avtomattandyrmaq. Bul týraly búgin Astana qalasy pedagogtarynyń dástúrli tamyz keńesinde málim boldy, dep habarlaıdy QazAqparat.
«Qazirgi kezde Astanadaǵy bilim berý júıesinde memlekettik bes qyzmet avtomattandyryldy. Onyń ishine balabaqshaǵa kezekke qoıý men joldama berý rásimderi enip otyr. Budan bólek, 2018 jyldyń 1 maýsymyna deıin balalardy mektepke qabyldaý qyzmetin avtomattandyrýdy josparlap otyrmyz», - dedi keńes barysynda qala ákimi Áset Isekeshev.
Onyń paıymynsha, osyndaı jańashyldyqtar qyzmetterdiń ashyqtyǵyn qamtamasyz etýde mańyzdy baǵyt bolmaq.
Esterińizge sala keteıik, elorda ákimdigi memlekettik balabaqshalarǵa joldamany elektrondy túrde berýdi bıylǵy sáýirden bastap engizdi.
