Astanalyq áıel balalarymen birge terezeden sekirmek bolǵan
9-shy qabattaǵy páterdiń terezesinen eki balasymen áıeldiń sekireıin dep jatqanyn estigen avtopatrýl oqıǵa ornyna attandy. Birinshi bolyp №26 ýchaskelik polıtsııa pýnktiniń polıtsııa bólimshesiniń aǵa ınspektory Asqar Papyshev óziniń seriktesi Eldos Nuǵmanovpen birge jetti.
Olar aýdan turǵyndarymen jıyn ótkizip jatqan bolatyn. 9-shy qabatqa kóterilgen polıtseıler úlken balanyń ákesimen birge turǵanyn kórdi. Al kishi balasyn áıel ózi ustap turyp, oǵan bireý jaqyndasa, sekiretinin aıtyp aıqaılaǵan. Tártip saqshylarynyń biri áıeldi sózge tartyp, mundaı qadamǵa barmaýyn ótinip jatqanda, ekinshi polıtseı formasyn azamattyq kıimge aýystyryp, sosyn páterge kirip, baıqatpaı jaqyndap, bir qolymen balanyń qolynan, ekinshi qolymen anasyn myqtap ustap alyp, bólmege qaraı tartyp kirgizdi.
24 jastaǵy áıeldiń otbasylyq janjaldan keıin osyndaı áreketke bel býǵany belgili boldy. Onyń kúıeýine qatysty Ákimshilik quqyq buzýshylyq týraly kodekstiń 73-babynyń 1-bóligi «Otbasylyq-turmystyq qatynastar salasyndaǵy quqyqqa qaıshy áreketter» boıynsha ákimshilik hattama toltyryldy.
Otbasy erekshe baqylaýǵa alyndy. Áıel balalarymen birge Astana qalasynyń daǵdarys ortalyǵyna ornalastyryldy. Onymen profılaktıkalyq áńgime júrgizilip, psıhologııalyq kómek kórsetildi.
