Astanalyq avtobýstaǵy janjal: Astana LRT túsinik berdi
ASTANA. QazAqparat - Elordadaǵy №51 avtobýsta bolǵan urys-keriske qatysty «Astana LRT» JShS baspasóz qyzmeti túsinik berdi, dep habarlaıdy QazAqparat tilshisi.
Aıta ketsek, buǵan deıin «astanovka98» atty Instagram paraqshada sózge kelispeı, ustasyp qalǵan er adamdardyń vıdeosy jarııalanǵan bolatyn. Vıdeoda eki jigittiń jaǵa ustasyp turǵanyn, olardyń janynda kondýktor áıeldiń turǵanyn kórýge bolady.
«Mine, Astanadaǵy 51-shi avtobýsta Ritz-Carlton-nyń janyndaǵy «Dostyq» kóshesindegi aıaldamada osyndaı jaǵdaı tirkeldi. Kondýktor valıdatsııadan ótpegen er adamdy jolaýshylarmen birge avtobýstan ıterip shyǵarǵaly jatyr», - delingen jazbada.
Osyǵan baılanysty QazAqparat tilshisi «Astana LRT» JShS baspasóz qyzmetine habarlasyp, istiń mán-jaıyn surap kórdi.
«Avtoparktiń dırektorymen sóılestik. Jaǵdaı bylaı bolǵan: bul jerde bir er adam kartany valıdatsııadan ótkizbeımin dep, bas tartqan. Sodan keıin kondýktor áıel oǵan kez kelgen jolaýshy kartany valıdatsııadan ótkizýi kerektigin, bolmaǵan jaǵdaıda polıtsııa shaqyratynyn eskertedi. Jaǵdaı aqyry urysqa aınalyp, ekeýiniń janynda turǵan taǵy bir er adam kondýktordy qorǵap, álgi er adamǵa «siz nege áıel adamǵa daýys kóteresiz. Bárimiz tóleımiz. Siz nege tólemeısiz» degen. Sodan urys shyqqan. Eshqandaı bir-birin uryp, jaraqattaıtyndaı tóbeles bolmaǵan. Eshkim de avtobýstan túsken joq. Álgi er adam aqyry valıdatsııadan kartasyn ótkizgen», - deıdi «Astana LRT» JShS baspasóz qyzmetinen Naýat Azanbaeva.
