Astanalyq ata-analardy qandaı máseleler tolǵandyrady
ASTANA. QazAqparat - Astana qalasynyń bilim basqarmasy jyl saıynǵy azamattardy qabyldaý kúnin ótkizdi, dep habarlaıdy elorda ákimdiginiń resmı saıty.
Qoǵamdyq qabyldaý M.Ótemisuly atyndaǵy Oqýshylar saraıynda ótti. Onda ata-analardy bilim basqarmasynyń basshysy Ánýar Janǵozın jáne orynbasarlary men barlyq bólim basshylary qabyldady. Ata-analar ózderin tolǵandyrǵan suraqtar boıynsha keńes aldy. Eń kóp suraq qosymsha bilim berý bóliminiń mamandaryna qoıyldy. Sondaı-aq, ata-analardy kámeletke tolmaǵandardy áleýmettendirý, mektepke deıingi tárbıe men oqytý máseleleri qyzyqtyrdy.
«Ashyq esik kúni» formatyndaǵy kezdesýler ótken jyly bastalǵan bolatyn. Shara maqsaty - elordalyq bilim berý júıesin jetildirýge yqpal etetin ózekti suraqtar men máselelerdi sheshý arqyly basqarma men qoǵam arasynda «syndarly dıalog» quryp, ózara baılanys ornatý jáne ózekti suraqtarǵa jaýap berý.
«Kezdesýge kele almaǵandar óz suraqtaryn áleýmettik jeliler arqyly joldady», - dedi bilim basqarmasynyń strategııa jáne sandyq tehnologııalardy taldaý bóliminiń basshysy Jazıra Asanova.
Odan bólek, mektepke qabyldaný úshin qandaı qujattar kerektigi, jol júrý jeńildigi, kópbalaly otbasylarǵa qandaı jeńildikter qarastyrylǵany jaıly qosymsha aqparattar jazylǵan paraqshalar taratyldy. Osy jerde qosymsha aqparat alý úshin bilim basqarmasy mamandarynyń telefondary da kórsetilgen.
