Astanalyq arý Seýldegi sulýlyq baıqaýynda Qazaqstan atynan óner kórsetti (FOTO)

OK-models agenttiginiń aqparatyna sáıkes baıqaýǵa álemniń 35 eliniń ókilderi qatysqan. Eki apta boıy aqtyq márege jetken sulýlar áleýmettik sharalarǵa, túsirilimder men suhbat berýlerge qatysqan.

MISSSUPERTALENT WORLD sán men shoý-bıznesi salasyndaǵy tamasha jetistikke jetkenderdi marapattaýǵa arnalǵan Halyqaralyq «Star Awards» sharasy aıasynda ótkizildi. Baıqaý qorytyndysynda Qazaqstan ókili álemdik TOP-15 sángeri qatarynan tabyldy.

Osy rette S.Sákenova ǵalamshardyń eń sulý ári talantty arýyn tańdaý qalaı júrgizilgendigi, kásibı sánger qandaı qasıetterge ıe bolýy kerektigi jáne Seýl nedeı erekshelikterimen este qalǵandyǵy jaıynda pikirimen bólisti.

Sánııa mundaı óte joǵary deńgeıdegi sharǵa tabysty qatysýyńmen quttyqtaımyz! Baıqaý qalaı ótkendigi jáne tóreshilerdiń senim údesine shyǵý úshin qalaı tyrysqanyń jaıynda aıtyp berseń.

Qaıyrly kún, quttyqtaýlaryńyz úshin rahmet. Jalpy, meniń jan dúnıem áli kúnge Seýlde desem de bolady. Bul baıqaý tek qana sángerlik kelbetke saı qyzdarǵa arnalǵanymen onda negizgi basymdyq olardyń darynyna da beriledi. Túpki ıdeıasy - qyzdar tek sulý ǵana emes sonymen birge kórkine aqyly saı bolýy tıis. Shyǵarmashylyq nómir jaıynda maǵan aldyn ala eskertilgen emes. Oǵan qosa daıyndalýǵa ýaqytym da bola qoıǵan joq. Degenmen, ózimniń daǵdymdy (Sánııa birneshe jyl bımen aınalysqan) esime túsire otyryp, nómirimdi kórsettim. Óner tek qatysýshylardy ǵana emes sonymen birge tóreshilerdi de tań qaldyrdy dep aıta alamyn. Ókinishke oraı, qysqa ýaqyttyń ishinde kásibı turǵydaǵy vıdeony túsirip, montaj jasaýǵa ýaqyt bolmady. Sonyń kesirinen men talanttar baıqaýyna jáne TOP-5-tikke enýime jol bermedi. Eger osynaý bir qıyndyqtar bolmaǵanda.... Kim biledi, múmkin táj meniki bolar ma edi...

Konkýrsqa qatysqan sátten fınalǵa deıin qandaı is-sharalarǵa qatystyń?

Kiamotors kompanııasy úshin Jessy Dress kóılekterimen fotosessııaǵa qatysýym bárin buryn esimde saqtalyp qaldy. Sonymen qatar qonaq úılerde, klýbtarda fotosessııadar júrgizildi. Seýl qalasy turǵyndary úshin kınofestıvaldiń ashylýynda bizderdiń sándi kıimdermen júrip ótýimiz zor mereke bolǵan sııaqty. Ásirese, balalar bizdiń sherýimizge tańdanyspen qarady. Munan bólek, fýtbol jáne basketbol oıyndaryna baryp, kóptegen jarnamalyq jobalarǵa, túrli tusaýkeserler men balalar merekelerine qatystyq.

Baıqaýdyń shyrqaý shegi, fınaldyq shoý qalaı ótkendigin aıtyp berseń?

Aqtyq saıys Seýldegi eń tamasha qonaq úılerdiń biri KingHotel-de ótti. Shoýǵa óte kóp adam keldi, zalda ıne shanshar oryn bolmady desek te bolady. Aqtyq saıysta biz negizinen podıýmda túrli kostıýmdermen júrdik.

Bul baıqaýǵa qatysqan barlyq qyzdardyń da óte sulý ári jeńiske laıyq bolǵandyǵyn atap ótkim keledi. Ásirese, maǵan Sıngapýr, Mońǵolııa, Reseı, Pýerto-Rıko, Meksıka, Chehııa, Bolgarııa, Vetnam, Ulybrıtanııa, Qytaı qyzdary unady.

Álemdik aýqymdaǵy baıqaýǵa qatysý tájirıbeńiz bar. Endi sángerlikti endi bastaǵandarǵa qandaı aqyl-keńes berer ediń?

Biraq nárse aıtamyn: Eger sende otanyńnan tysqary jerde ótetin halyqaralyq baıqaýǵa qatysý múmkindigi týsa, irkilmeı bar. Bul seniń kásibı turǵyda ósýińe baǵa jetpes tájirıbe jáne óz elińdi pash etýge berilip otyrǵan biregeı múmkinshilik. Munaı baıqaýǵa Eýropa men Azııanyń belgili sángerleri qatysyp jatady. Olarmen áńgimelesý ári tájirıbe jınaý ár ýaqytta da paıdaly. Buǵan qosa, aǵylshyn tilin aýyz eki sóıleýde de biraz meńgerip alasyń. Óıtkeni, bul tilde barlyǵy da sóıleıdi desek bolady. Barynsha belsendi, ashyq ári ózińdi óziń qorǵaı alýǵa tıissiń. Adamdar ár túrli, bul ómir, soǵan beıimdele tús.