Astanalyq alaıaq 100-den asa adamdy «nesıe áperem» dep aldaǵan
ASTANA. QazAqparat - Elordalyq polıtsııa ınternette qoljetimdi nesıe usynatyn alaıaqtardyń áreketi týraly eskertedi. Azamattar alaıaqtardyń ýádesine senip, aqshasynan aıyrylyp jatyr, dep habarlaıdy Astana qalalyq polıtsııa departamentiniń baspasóz qyzmeti.
21 aqpanda Astana krımınaldyq polıtsııa qyzmetkerleri buryn isti bolǵan 32 jastaǵy Qostanaı turǵynyn ustady. Kúdikti ınternette nesıe berem jáne nesıe tarıhyn jaqsartam dep jalǵan aqparat taratqan. Alaıaq saıt qoldanýshylarymen basqa tulǵalardyń atynan jalǵan kelisim jasap, saqtandyrý qyzmeti úshin qaıtys bolǵan adamnyń atyna tirkelgen bank kartasyna aldyn ala tólem jasaýyn suraǵan. Ol aldyn ala tólemdi alǵannan keıin habarlamany óshirip, telefonyn sóndirip tastaǵan. Polıtsııa qyzmetkerleri ony ustady.
Kúdikti Astana PD ýaqytsha ustaý ızolıatoryna qamaldy. Qazir onyń osy sekildi 100 iske qatysy bary tekserilip jatyr.
Eger siz osy alaıaqtyń áreketinen zardap shegip, 5578 3427 0906 5764 bank kartasyna aldyn-ala tólem jasasańyz, Astana qalalyq PD Krımınaldyq polıtsııa basqarmasyna habarlasyńyz: 71-62-91, 71-63-35, 8701-333-35-18, 8702-482-22-78.
