Astanalyq 47 túlek JOO-da tegin oqıtyn boldy
ASTANA. QazAqparat - Astanada 47 mektep túlegi qala ákiminiń granty boıynsha joǵary oqý oryndarynda tegin oqıtyn bolady, dep habarlaıdy QazAqparat.
Elorda ákimdiginen málim etkendeı, Astana qalasy ákimdiginiń janyndaǵy komıssııa sheshiminiń qorytyndysy boıynsha 47 túlek grant ıesi atandy. Olardyń arasynda jetim balalar, múgedek jandar, ata-ananyń qamqorlyǵynsyz qalǵan jáne kópbalaly otbasydan shyqqan balalar bar.
Ákimniń bilim granty suranysy joǵary mamandyqtarǵa bólindi. Ásirese tehnıkalyq, pedagogıkalyq jáne medıtsınalyq baǵyttarǵa basymdyq berilgen.
«Biz úshin sizder barlyǵyńyz jeńimpazsyzdar. Sizderdiń grant ıegeri atanýlaryńyzdyń ózi erik-jigerlerińiz ben maqsatshyl ekenderińizdi kórsetip tur. Sizder armanǵa qol jetkizý úshin birinshi úlken qadamdy jasadyńyzdar. Bul tek birinshi jeńis, qalǵany alda kútip turǵanyna senimdimin. Árdaıym kúshti, belsendi, ómirde de kóshbasshy bolyńyzdar. Kúni erteń sizder tek ózderińizge ǵana jol salmaısyzdar, elge de septigin tıgizesizder. Búginde sizderdiń tehnologııa, ǵylym taǵy basqa da salany damytýǵa keremet múmkindikterińiz bar. Sizderge josparlaryńyz ben ıdeıalaryńyzdy iske asyrýǵa tilektespin», - dedi Áset Isekeshev.
Qorytyndy boıynsha S. Seıfýllın atyndaǵy Qazaq agrotehnıkalyq ýnıversıtetine - 17 adam, «Astana» medıtsına ýnıversıtetine - 7 adam, «Turan Astana» ýnıversıtetine - 1, Qazaq ekonomıka, qarjy jáne halyqaralyq saýda ýnıversıtetine - 14, Qazaq tehnologııa ýnıversıtetinde jáne Eýrazııa gýmanıtarlyq ınstıtýtyna - 4 túlekten tústi.
Aıta keteıik, bıylǵy oqý jyly birinshi ret JOO-larda jańa mamandyq paıda boldy: qurylysta 3D tańbasyn jobalaýshy, kompıýterlik júıeniń taldaýshysy jáne ázirleýshi (razrabotchık), web- dızaıner jáne landshaft dızaıneri.
Búginge deıin ákimniń jalpy bilim berý grantyna 125 stýdent ıe boldy.
