Astanalyq 3 kedenshi attestattaýdan ótpeı qaldy

ASTANA.  30 shilde. QazAqparat - Qazaqstan Respýblıkasynyń keden organdaryndaǵy Ortalyq attestattaý komıssııasy óz jumysyn aıaqtady.

Onyń barysynda  Astana qalasy boıynsha kedendik baqylaý departamentiniń 7 qyzmetkeri attestattaý úderisinen ótip, nátıjesinde 3 qyzmetker óz qyzmetterine laıyq emes dep tanyldy. Bul týraly Kedendik baqylaý departamentinen habarlandy.

Atap aıtqanda, attestattaý barysynda 1 qyzmetker óziniń laýazymyna sáıkes dep tanylyp, oǵan kadrlyq rezervke esepke alynýǵa nemese joǵary laýazymǵa aýystyrylýǵa qatysty usynym jasaldy. Al 3 qyzmetker ózderiniń qyzmetine laıyqty dep sanalsa, qalǵan 3 kedenshi óz laýazymdaryna saı emes dep tanyldy. Attestattaýdan óte almaǵan qyzmetkerlerdi basqa qyzmetterge aýystyrý týraly usynym jasalǵan.

Qazirgi tańda Aımaqtyq attestattaý komıssııasy óz jumysyn jalǵastyratyn bolady. Shara barysynda Astana qalasy boıynsha kedendik baqylaý departamentiniń 55 jaýapty tulǵasy attestattaýdan ótpek. Bular negizinen kontrabandamen kúres jónindegi bólimsheniń jáne jedel-kezekshilik qyzmet bólimsheleriniń qyzmetkerleri bolyp tabylady.