Astanalyq 26 mektep túlegi qala ákiminiń bilim grantyna ıe boldy

Granttardy elorda basshysynyń orynbasary Ámirhan Raqymjanov tabystady, dep habarlaıdy QazAqparat.

Á.Raqymjanovtyń atap kórsetkenindeı, Astana qalasy ákiminiń bilim granttary 2004 jyldan bastap, áleýmettik kómekke asa zárý - tul jetimderge, týa bitken múgedekterge, balalar úıleriniń tárbıelenýshilerine, kóp balaly otbasylar men ata-anasynyń qamqorlyǵynsyz qalǵan balalarǵa berilip keledi. Búginde atalmysh grant boıynsha, bıylǵy jylǵy 26 grant ıegerin qosa eseptegende, barlyǵy 99 stýdent bilim alyp jatyr. Olardyń oqýyna aǵymdaǵy jyly qala bıýdjetinen 23,8 mıllıon teńge bólindi.

 Ákimniń granttary elordanyń eńbek naryǵyna barynsha qajetti - tehnıkalyq, pedagogıkalyq jáne medıtsınalyq mamandyqtar boıynsha L.Gýmılev atyndaǵy Eýrazııa Ulttyq ýnıversıtetine, S.Seıfýllın atyndaǵy Qazaq agrotehnıkalyq ýnıversıtetine, Qazaq ekonomıka, qarjy jáne halyqaralyq saýda ýnıversıtetine, «Astana medıtsınalyq ýnıversıteti» AQ-na jáne Eýrazııa gýmanıtarlyq ınstıtýtyna baǵyttaldy.