Astanalyq 25 úmitker bıznestiń áleýmettik jaýapkershiligi jónindegi «Paryz» baıqaýyna qatysady

ASTANA. 30 qazan. QazAqparat - Búgin Elordada bıznestiń áleýmettik jaýapkershiligi jónindegi «Paryz» respýblıkalyq baıqaýyna qatysatyn úmitkerler tizimi bekitildi. Bul týraly áleýmettik seriktestik pen áleýmettik jáne eńbek qatynastaryn retteý boıynsha qalalyq úsh jaqty komıssııanyń kezekti otyrysynda belgili boldy.

Astana qalasy ákiminiń orynbasary Aıda Balaevanyń jetekshiligimen ótken otyrysta qaralǵan máselelerdiń biri áleýetti úmitkerlerdi bıznestiń áleýmettik jaýapkershiligi jónindegi «Paryz» baıqaýyna qatysýǵa jiberý boldy.

Jalpy alǵanda, baıqaýǵa qatysýǵa 25 jeke kásipkerlik sýbektisi ótinim bergen. Atap aıtqanda, «Úzdik áleýmettik jaýapty kásiporyn» atalymy boıynsha 13 sýbekti, sonyń ishinde 6 iri, 1 orta jáne 6 shaǵyn kásiporyn. «Jyldyń úzdik áleýmettik jobasy» atalymynda 2 sýbekti, 1 shaǵyn jáne 1 iri kásiporyn. «Úzdik ujymdyq shart» - 8 sýbekti, 6 iri jáne 2 orta kásiporyn.

«Baıqaýdy jeltoqsan aıynda Eńbek jáne halyqty áleýmettik qorǵaý mınıstrligi ótkizedi. Bizdiń mindetimiz - Astana qalasynyń atynan baıqaýǵa kandıdattar jiberý. Qatysýshylardy baǵalaý úshin baıqaý úmitkeriniń qyzmetiniń múmkindikteri men nátıjelerin sıpattaıtyn arnaıy krıterııler jasaldy. Soǵan sáıkes bárine balldar qoıyldy. Naqtyraq aıtsaq, áleýmettik pakettiń bolýy, demeýshilik, eńbekaqy, kásibı daıyndyq, kúzet jáne t.b. Bul negizdelgen jáne laıyqty baǵalar», - dedi Jumyspen qamtý jáne áleýmettik baǵdarlamalar basqarmasynyń jetekshisi Oljas Omar óz baıandamasynda. Bul týraly astana.kz habarlady.