Astanalyq 10-synyp oqýshysy álemniń úzdik 50 shahmatshysynyń tizimine endi
Bul jaıynda qalalyq №54 mektep-lıtseıiniń baspasóz qyzmeti málim etti.
«Ózderińizge belgili, mektebimizde shahmattan álemniń birneshe dúrkin chempıony bilim alady. Naqtyraq aıtsaq, mektebimizdiń 10-synyp oqýshysy Merýert Kamalıdenova esimi búginde keńinen tanymal. Ol týraly, onyń jetistikteri týraly osyǵan deıin de talaı jazǵan bolatynbyz. Búgin taǵy da sizderden súıinshi suraıtyn qýanyshty sát! Shahmattan halyqaralyq qyzdar sheberi Merýert oqýshymyz jaqynda Italııanyń Kattolıka qalasynda ótken Grandiscacchi International Chess Festival 2022 chempıonatynda azýly qarsylastaryn shań qaptyryp, óte joǵary kórsetkishke ıe boldy. Osylaısha álemniń TOP-50 úzdik sportshysynyń tizimine endi» delingen mektep taratqan málimette.
Merýert Kamalıdenova — qazaqstandyq shahmatshy, halyqaralyq sport sheberi, jastar arasyndaǵy álem chempıonatynyń jeńimpazy.
Birneshe ret Qazaqstan atynan álem jáne Azııa chempıonatynda ártúrli jas toptarynda óner kórsetken.
14 jasqa deıingi qyzdar arasyndaǵy shahmattan álem chempıonatynda, shahmattan qyzdar arasyndaǵy Azııa chempıonatynda jeńiske jetken.
Qyzdar arasynda 2021 jylǵy Qazaqstan chempıony.
2021 jyly áıelder arasyndaǵy komandalyq álem chempıonatynyń shırek fınalısi atandy, úshinshi taqtada jekeleı synda qola medal jeńip aldy.
Týrnırlerdegi tabysy úshin FIDE Merýert Kamalıdenovaǵa 2019 jyly qyzdar arasyndaǵy halyqaralyq sheber (WIM) ataǵyn berdi.
Byltyr shahmatshy Úndistanda ótken jastar arasyndaǵy álem chempıonatynda 14 jasqa deıingi qyzdar arasynda altyn jeńip aldy.
