Astanalyqtarǵa jaqsy múmkindik: 5 paıyzdyq ıpotekamen 562 páter beriledi
ASTANA. KAZINFORM — Astanada 7 qazan kúni turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda nesıege beriletin turǵyn úı boıynsha ótinish qabyldaý bastalady. Bul týraly qalalyq Turǵyn úı jáne turǵyn úı ınspektsııasy basqarmasy habarlady.
Turǵyn úı A91 kóshesindegi 36, 36/1, 36/2 jáne 36/3 úılerinde ornalasqan. Nysandardyń kody — 10336, 10338, 10339 jáne 10340.
Ótinishter 7-19 qazan aralyǵynda Baspana Market saıtyndaǵy jeke kabınet arqyly qabyldanady. Kandıdattardy irikteý 21 qazanǵa josparlanǵan.
Jalpy 562 páter usynylady. Onyń ishinde:
- 1 bólmeli — 166 páter;
- 2 bólmeli — 276 páter;
- 3 bólmeli — 80 páter;
- 4 bólmeli — 40 páter.
Turǵyn úıler bes qabatty, lıft qarastyrylmaǵan. Páterler taza árlengen kúıde beriledi.
Turǵyn úıdiń bir sharshy metriniń quny — 332 916 teńge.
Nesıe boıynsha paıyzdyq mólsherleme — 5%, jyldyq tıimdi syıaqy mólsherlemesi (JTSM) 5,2%-dan 5,8%-ǵa deıin. Bastapqy jarna mólsheri 10%-dan bastalady.
Eske salaıyq, munyń aldynda elimizde 2 paıyzdyq ıpotekaǵa kimder ótinish bere alatyny jóninde jazǵan edik.
