Astanalyqtarǵa kólik salyǵyn 1 sáýirge deıin tóleý eskertildi

ASTANA. KAZINFORM — Astana qalasynda jeke tulǵalarǵa kólik salyǵyn 1 sáýirge deıin tóleý kerektigi eskertildi. Bul týraly Astana qalasy boıynsha Memlekettik kirister departamentiniń óndiristik emes tólemder basqarmasynyń basshysynyń mindetin atqarýshy Altyngúl Toqaeva habarlady. 

— Salyq kodeksine sáıkes, kólik salyǵyn óz menshiginde salyq salý obektisi bar jeke tulǵalar tóleıdi. Sonymen qatar, Qazaqstan aýmaǵynda tirkelgen nemese esepte turǵan barlyq kólik quraly (tirkemelerdi qospaǵanda) salyq salý obektisi, — dedi Altyngúl Toqaeva Astana qalasynyń kommýnıkatsııalar qyzmetinde ótken brıfıngte.

Spıkerdiń aıtýynsha, salyqty esepteý kezeńi 1 qańtardan 31 jeltoqsanǵa deıingi kúntizbelik jyldy qamtıdy. Jeke tulǵalar ózderi salyqty eseptep, tólem júrgizedi. Sonymen qatar, salyq organdary esepti jyldyń sońynda tólem somasyn eseptep, salyq tóleýshilerge habarlaıdy.

— Eger salyq ýaqytynda tólenbese, salyq organy boryshkerge habarlama jiberedi. Habarlama alynǵannan keıin bereshekti erikti túrde óteý úshin 30 jumys kúni beriledi. Osy merzimde tólem jasalmasa, salyq organy bereshekti óndirip alý týraly buıryq shyǵarady. Eger tólem odan keıin de júrgizilmese, is atqarýshylyq organdarǵa joldanyp, borysh sot oryndaýshylary arqyly óndirilip alynady, — dedi spıker.

Sonymen qatar, úsh aıdan astam ýaqyt ótelmegen jáne 40 aılyq eseptik kórsetkishten asqan bereshek bolǵan jaǵdaıda, azamattyń Qazaqstannan tys jerge shyǵýyna ýaqytsha shekteý qoıylýy múmkin.

— Kólik salyǵyn ýaqytynda tóleý bereshektiń paıda bolýyna, qosymsha shyǵyndardyń týyndaýyna jáne sotqa joldanýdyń aldyn alady. Sondyqtan óz salyq mindettemelerin aldyn ala tekserip, tólemderdi belgilengen merzimde júrgizý asa mańyzdy, — dedi departament ókili.

Eske sala keteıik, 2026 jylǵy 1 qańtardan bastap jańa Salyq kodeksine sáıkes kólik salyǵyn esepteý tártibi ózgerdi.