Astanalyqtardyń salyq bereshegi 3 mıllıard teńgeden asty

ASTANA. KAZINFORM — Astana qalasynda 60 myńnan astam salyq tóleýshiniń kólik jáne múlik salyqtary boıynsha 3 mlrd 89 mln teńge kóleminde bereshegi bar. Bul týraly Astana qalasy boıynsha Memlekettik kirister departamentiniń óndiristik emes tólemder basqarmasynyń basshysynyń mindetin atqarýshy Altyngúl Toqaeva habarlady.

— 2026 jylǵy 5 naýryzdaǵy jaǵdaı boıynsha Astana qalasynda 60 393 salyq tóleýshiniń kólik jáne múlik salyqtary boıynsha 3 mlrd 89 mln teńge kóleminde bereshegi bar. Onyń negizgi bóligi kólik quraldary salyǵyna tıesili, bul soma 2 mlrd 750 mln teńgeni quraıdy, — dedi Altyngúl Toqaeva Astana qalasynyń kommýnıkatsııalar qyzmetinde ótken brıfıngte.

Onyń aıtýynsha, Qazaqstan Respýblıkasynyń Salyq kodeksine sáıkes salyq salý obektisi óz menshiginde bolatyn jeke tulǵalar kólik salyǵyn tóleıdi. Sonymen qatar, Qazaqstan aýmaǵynda tirkelgen nemese esepte turǵan barlyq kólik quraldary (tirkemelerdi qospaǵanda) salyq salý obektisi bolyp sanalady.

— Kólik quraldary salyǵyn ýaqytynda tóleý salyqtyq bereshektiń paıda bolýyna jol bermeıdi jáne qosymsha qarjylyq shyǵyndardyń aldyn alady. Sondyqtan azamattarǵa óz salyq mindettemelerin aldyn ala tekserip, tólemderdi ýaqytynda júrgizý asa mańyzdy, — dep atap ótti departament ókili.

Eske sala keteıik, 2026 jylǵy 1 qańtardan bastap jańa Salyq kodeksine sáıkes kólik salyǵyn esepteý tártibi ózgerdi.