Astanalyqtar jylý tarıfin ústeme baǵamen tólep kelgen

ASTANA. KAZINFORM – Astana turǵyndary jylý aqysyn belgilengen mejeden joǵary baǵamen tólep kelgen. Bul týraly Astana qalasynyń mamandandyrylǵan aýdanaralyq ekonomıkalyq soty málim etti. 

— Tabıǵı monopolııalardy retteý salasyndaǵy ýákiletti organ elordalyq ekonomıkalyq sotqa jylý energııasy boıynsha tarıfti tómendetýge májbúrleý týraly talap qoıýmen júgindi. Sot jaýapkerdiń jylý energııasyn jetkizý jónindegi tabıǵı monopolııalardyń sýbektisi bolyp tabylatynyn anyqtady. Aýdıtorlyq tekserý arqyly kórsetiletin qyzmetter kólemin ulǵaıtý esebinen tarıf boıynsha zań buzýshylyqtar anyqtaldy. Tarıfterdi qalyptastyrý qaǵıdalarynda qyzmetter kólemi ulǵaıǵan jaǵdaıda, rettelip kórsetiletin qyzmetterge tarıfti tómendetý kózdelgen. Alaıda, AQ tarıfterdi tómendetpegen, bul artyq paıda alýǵa jáne tutynýshylardyń joǵary tarıf boıynsha artyq tóleýine ákep soqty, — delingen sot habarlamasynda. 

Málim bolǵandaı, alynǵan paıda retteletin qyzmetti damytýǵa jáne tıimdi jumys isteýge baǵyttalýy kerek, bul bekitilgen tarıftik smetaǵa sáıkes keledi.

— Jaýapker qyzmetter kólemin ulǵaıtý nátıjesinde alynǵan tabysty zańnamada kózdelgen maqsattarǵa baǵyttalmaǵan jáne tarıfti tómendetýdi júrgizbegen. Sondyqtan sot monopolıstke qatysty talap qoıýdy qanaǵattandyrdy, jaýapkerge tarıfti tómendetý mindettemesi júkteldi, al onyń paıdasy jylý jelilerin damytýǵa baǵyttalýy kerek, — dep habarlady Astana sotynan.

Sheshim zańdy kúshine endi.

Eske sala keteıik, buǵan deıin Almatyda jylý men ystyq sý baǵasy nelikten óskenin jazǵan edik.