Astanalyqtar tegin dóner úshin taptalyp qala jazdady
ASTANA. KAZINFORM — Elordada jeke kásipker tegin 1000 dóner taratatynyn aıtyp jarnama jasaǵan. Al kópshilik oǵan aǵylyp kelgen.
Áleýmettik jelide taraǵan vıdeodan baıqasaq, tegin dóner jegisi kelgen turǵyndardyń qarasy kóp.
Sondaı-aq, kadrdan adamdardyń bir-birin ıterip, basa kóktep alǵa umtylyp jatqanyn baıqaýǵa bolady.
«25 qyrkúıekte dámhananyń ashylýyna oraı jeńildikpen dónerge talon alýǵa halyq kóp jınalǵan. Jaǵdaıdy retteý jáne soqtyǵystyń aldyn alý maqsatynda oqıǵa ornyna polıtsııa qyzmetkerleri men Esil aýdany ákimdiginiń ókilderi bardy. Polıtseıler is-sharany uıymdastyrýshylardy anyqtady. Bul fakt boıynsha jeke kásipker ákimshilik jaýapkershilikke tartyldy», — degen habar aldyq qalalyq polıtsııa departamentinen.
Aıta ketsek, halyqtyń topyrlaýyna jol bergen kásip ıesine 73 840 teńge aıyppul saldy.
Eske sala keteıik, taıaýda Astanada dóner tsehynda jarylys bolyp, janyndaǵy kólikti jalyn sharpyǵan edi.
