Astanalyqtar tasqynnan zardap shekken óńirlerge 550 tonna gýmanıtarlyq kómek jiberdi
ASTANA. KAZINFORM – Astana qalasy eriktileriniń front keńsesiniń basshysy Elvıra Esmuqanova ortalyq kommýnıkatsııalar qyzmetinde ótken brıfıngide elorda eriktileriniń tasqynnan zardap shekken aımaqtarǵa qansha kómek jibergenin aıtty.
«Qazaqstannyń úsh óńirinde Tótenshe jaǵdaı rejımi jarııalanǵan sátten bastap Astana qalasnyda eriktilerdiń atsalysýymen gýmanıtarlyq kómek jınaıtyn 9 oryn ashyldy. Kómek jınaýǵa 30 eriktiler uıymy tartyldy. Jınalǵan dúnıeni iriktep, qaptaýǵa kún saıyn 60 adam jumyldyryp otyrmyz. Qala kásipkerleri óz betimen kómek jınap jatyr. Olar da kómegin bizdiń jeli arqyly jiberýde. Búginge deıin tasqynnan zardap shekken óńirlerge Astanada 550 tonna gýmanıtarlyq kómek joldandy», - dedi ol.
Eriktiler ókili astanalyqtardyń tasqyn aýmaqtaryna qandaı kómek joldaǵanyn da aıtty.
«Óńirlerge azyq-túlik, jylytqysh peshter, qaıyq, generator, kúrek, 400 myń qap, balalardyń kıim-keshegi men buıymdaryn, kórpe-jastyq jiberildi. Kómektiń bir bóligi áýe arqyly jetip jatyr», - dedi Elvıra Esmuqanova.
